Lengpui Airport-ah thutlukna la siam lo: Sorkar leh IAF an indawr leh dawn

Chief minister Lalduhoma chuan October 16, Nilaini khan Council of Minister-in midang kuta Lengpui Airport hlan tur leh tur loh chungchang an ngaihtuah tih nimina amah kawmtu thuthar thehdarhtute hrilhin, "Thutlukna siam a la ni lo," a ti.

Lalduhoma chuan December 1998-ah Lengpui Airport hawn a nih thu sawiin, "Keimahni chauh chuan kan enkawl zawh dawn loh avangin Congress leh MNF hunlai pawhin tihral an duh. MNF sorkar liamta khan kum 2022 khan Airport Authority of India (AAI)-te nen draft agreement an siam a, an puitlin hmain keini kan rawn lang a ni," a ti a, an sorkar hnuah working com­mi­ttee siamin AAI-te pawh an biak chhunzawm ve thu a sawi.

AAI-te chuan a thlawna pek a, a hmun neih an duhthu sawiin Chief Minister chuan, "An duhdan pawm chi-ah kan ngai lo. AAI hian airport tam tak an enkawl a, an enkawl seng lo. Midang kutah an hlan leh dawn. Indian Air Force (IAF) nen vawi sarih lai working committee-te an in dawr a, a hmunhmate an enho. Committee hian an report chu an rawn thehlut a, hei hi Council of Minister-ah ngaihtuah a ni," a ti.

Chief Minister chuan IAF-te kuta hlan a nih chuan anni chuan Mizoram sorkarah a man an pek tur thu sawiin, "Ram an mamawh belh a nih pawhin sorkarin ram tur a lak sak ang a, zangnadawmna chu anmahniin pek vek an inhuam. Tin, IAF kutah lo hlan ta pawh ni ila, a runway bak an chang dawn loa, terminal chu kan kut tur tho a la ni," a ti a, terminal chauhah chuan sorkarin hlawkna a tel ve theih tur thu a sawi.

Lalduhoma chuan, Lengpui Airport enkawlna senso chu a san avangin sorkarin a chawi belh nasat bakah a tihchangtlunna tur a ngaih tam thu sawiin, "Runway-te khu a chhe tawh em em a, tihchangtlung turin vbc. tam a ngai a, keini ang state tan chuan a harsa. Pilot-in khaw chin an hmuh awlsamnate pawh tihchangtlun a ngai em em a, chhum a zìn hlekin thlawhtheihna a ṭum thei ṭhin lo. Cheng vbc. 20 vel senna tur a ni. IAF chuan hengte hi tih vek an inhuam," a ti.

India hmarchhakah airport 18 awmin, chu'ng zingah chuan Lengpui Airport chiah state sorkar enkawl a awm tih sawiin Lalduhoma chuan, "India ram pumah airport 335 vel a awm a, chu'ng zingah pawh chuan state sorkar enkawl chu Lengpui Airport chiah. State enkawl ang deuh awm chhun chu state airport authority dinin PPP mode-in an kal," a ti a, state hausa zawkte pawhin airport enkawl an inhuam loh thu a sawi.

Chief Minister sawi danin, an sorkar hnuah Lengpui Airport ram chin ṭum thum teh a ni tawh a, a zim tual tual. Mimal ram a tam telh telh a, dan kengkawhtu tur zawka ngaihte'n ram an lo nei. A tira mi ang chiahin an tehfel a, an hung dawn. Dan loa ram lo neite chuan duh leh rawn khing rawh se, tiin sorkar a kal. Tun thleng chuan sorkarin khingtu a la nei lo.