Serchhip district MSCU Branch hawng

Serchhip district bawrhsap Paul L Khuma chuan nimin khan DC Pisapui Hall-ah Mizoram district hrang hranga branch ding hmasa ber ni turin Mizoram State Cooperative Union, Serchhip Branch a hawng.

Paul L Khuma chuan, Mizoram State Cooperative Union, Serchhip Branch hawn a ni ta chu lawmawm a tih thu a sawi a, "Cooperative Society hrang hrangte khaitu tur MSCU hruaitu tharte chu society ding mekte leh la ding zel turte tan an pawimawh a, an kalphung leh kal dan khalh ngiltu, society hrang hrangte chawikangtu an nih a ngai dawn a ni," a ti.

District-a MSCU Branch hawn leh din chungchang hi July 19, 2024 khan rel niin, Registrar of Cooperative Society chuan a pawm a; district-a branch ding hmasa ber ni turin Serchhip District MSCU hi a lo piang ta a, district dangah pawh MSCU Branch hi hawn zel tum a ni.

Mizoram State Cooperative Union hi kum 1975-ah din a ni a, a dinchhan leh tum ber chu Mizoramah cooperative movement hmasawnna leh chakna tur te, cooperative society-a telte leh a ngaihventute zirtir leh training neihpui te a ni.