Bairabi - Sairang rel kawng siam hna July 31, 2025 hmain zawh tum a ni

Chief minister Lalduhoma chuan nimin khan a pisaah Bairabi leh Sairang inkara rel kawng siam hna thawh mek chungchang North East Frontier Railways (NFR) general manager (construction) Arun Kumar Chaudhary sawipui a; NER General Manager chuan July 31, 2025 hmain an hnate zawh hman an tum thu a sawi.

Lalduhoma chuan, rel chawlhhmun (rel station) panna kawng (approach road)-te chu a rang lama sial turin Mizoram sorkarin hma a lak tur thu a sawi a, "Rel a service theih hunah Mizo ṭhalaite tan hna engemaw zat a awm theih ka beisei," a ti a, NER-in hmabak an neih hrang hrangte a zawt nghal.

NER GM Arun Kumar Chaudhary chuan, Bairabi - Sairang rel kawng siamnaa an hnate chu July 31, 2025 hmain zawh hman an tum thu a sawi a, "Eng emaw harsatna danglam bik a thleng a nih loh chuan kan zo hman ngeiin kan ring. Lei dawh sang tak tak a awm nual a, chuta ṭanga han hawi vel hian a mawi em em vek a, he rel kawng hian transportation lama awlsamna bakah khualzin pawh a hip nasain kan ring ni," a ti a; an hmalaknate hmuhpui turin Chief Minister chu a sawm nghal.