KHAWTHLIR

Zangnadawmna pe

Aizawl District Disaster Management Authority thuchhuahin a tarlan danin, June 15, 2024-a thingtlu vanga nunna chan Lalnuntluangi w/o Chhanliana, Samlukhai leh August 3, 2024-a in kanga nunna chan T Lalromana, Turial-te chu sorkarin zangnadawmna a pe a, an chhungte hnenah Rs 4,00,000 ve ve hlan a ni.

Vankal Solar Park tlawh

Power & Electricity minister F Rodingliana chuan tunhnai khan Vankal Solar Park a tlawh a; solar park hmuna ram awl la awm chhawr ṭangkai dan tur te, solar plant aṭanga kawlphetha siam chhuahte dahkhawlan atana Tuichang luia pump storage project siam theih a nih leh nih lohte a enfiah. Minister hi Khawzawl BDO, P&E Chief Engineer (RE) leh official dangte'n an ṭawiawm a ni.

HIV/AIDS Awareness

Mamit District AIDS Prevention & Control Committee (DAPCC) chuan nimin khan Mamit Chhim Veng YMA Hall-ah 'Intensive IEC Campaign, 2024 - India Fight Against HIV/AIDS & STI' thawh hnihna an buatsaih a, HIV/AIDS chungchanga thi pawimawhte an inzirtir bakah sikul naupangte debate hmangin an intihsiak a ni.

Kut hnathawktute tan training buatsaih

KVK Champhai district, Khawzawl leh Mizoram University ṭangkawp chuan nimin khan Chawngtlai khuaa kut hnathawktu mi 52-te tan Bio-Tech Kisan Hub Project kaltlangin 'Medicinal and Aromatic Plant Bio-resources for Rural Prosperity in Mizoram' tih thupui hmangin training an buatsaih a; Mizorama ramhmul damdawi leh rimtui atana hman chi thlaite hman ṭangkai leh humhalh chungchang an zirtir bakah, natna leh rannung laka thlai venna hmanrua sem a ni.

Heroin man

Excise & Narcotics department leh 42nd Bn. Assam Rifles thawk dun chuan October 16, Nilaini zan khan Tlangsam khaw dai, leilet zawl, Champhai district-ah heroin gram 323.170 leh a neitu nia puh Zamdolian (65) s/o Awnkhankhup, Bulfek, Myanmar-a khawsa nia inchhal an man.