Lunglei district-a tleirawl zingah vaihlo leh a kaihhnawih a hluar

Lungleiah additional deputy commissioner James Miahlung chuan nimin khan Convention Centre-ah ṭhalaite zuk leh hmuama an fihlim theih nana beihpui thlak tur, 'Tobacco Free Youth Campaign 2.0' a hawng a; Lunglei district-ah mipa tleirawl 75% leh hmeichhe tleirawl 62%-in vaihlo leh a kaihhnawih an khawih thu a sawi.

James Miahlung chuan, zuk leh hmuama fihlim tura beihpui thlak tur chu hriselna khawih thil a nih avangin a pawimawh thu a sawi a, "Mizoramah kum 13 leh 15 inkarah 58%-in vaihlo leh a kaihhnawih an khawih a, Lunglei district bikah mipa tleirawl zinga 75% leh hmeichhe tleirawl zinga 62%-in vaihlo leh a kaihhnawih an khawih. Ruihhlo ngai leh ngawlvei tam ber chu tleirawl laia vaihlo leh a kaihhnawiha fihlim lote an nih avangin ngaihthah chi a ni lo," a ti a, vaihlo leh a kaihhnawih laka inthiarfihlim turin ṭhalaite a chah.

Tobacco Free Youth Campaign 2.0 hawnna inkhawmah hian higher secondary school zirlaite bakah, sawm bik sorkar official ṭhenkhatte an tel a; hawnna inkhawm zawhah Convention Centre aṭanga Old Tennis Court thleng hemi pual hian kawng zawh a ni.

Lawngtlaiah pawh nimin khan District Level Coordination Committee on Tobacco Control chu an chairman Cheemala Siva Gopal Reddy, district bawrhsap kaihhruaiin an ṭhukhawm a; Tobacoo Free Vilage' atan Chawnhu khua an puang.

Bawrhsap hian Lawngtlai district National Tobacco Control Programme (NTCP) bultum 'Tobacco Free Youth Campaign 2.0' a hawng nghal a; DC bakah, Lawngtlai SP R Lokeshwaran leh senior chief medical officer Dr David Zothantluanga ten zuk leh hmuam leh vaihlo aṭanga thil siam chungchanga thil pawimawh hrang hrang an sawi.