Hrangchalkawn Police Out Post hawng

Lunglei South bialtu MLA Lalramliana Papuia chuan nimin khan national highway kawngpui laih zauh hna thawhin a sut buai avanga February 2023 aṭanga tihtawp tâk Hrangchalkawn Police Out Post chu bulṭan ṭhat leh turin a hawng a; MLA fund aṭangin out post-a hman tur CCTV leh inverter a ngaihtuahsak tur thu a sawi.

Lalramliana Papuia chuan, mipui himna leh ralmuanna chu ram tana thil pawimawh ber pakhat leh Mizoram sorkar pawhin a ngaih pawimawh a nih thu a sawi a, "Sorkarin ram mipui himna leh ralmuanna atan police 300 dawn la thar turin ruahmanna a siam mek a, police hna hi hna zahawm a nih laiin a thawktute'n tihzahawm loh theih a ni a, chuvangin thawktute pawh fimkhur leh infuih thar reng a pawimawh," a ti a, hawihhawmna, rinawmna, huaisenna, taimakna leh thuawihna nen khawtlang leh ram tan theihtawp chhuah tuin police-te a chah.

DIG (Southern Range) C Lalthanmawia pawhin thu sawiin, police-te chu remna leh muanna vawng himtu tur an ni tih a thawktute leh mipuite'n an hriatchian a ṭul thu a sawi a, "Mipui rorelna hnuaiah mipui kan zalen a, mahse, zalenna hi hman sual theih a ni. Kan aiawha kan thlan dan siamtute'n invawnna dan an siam chu mipuiin thuawih taka kan zawm a ngai," a ti a; police-te'n khawtlang hruaitu, tlawmngai pawl leh mipuite thawhpuina bakah, kohhrante ṭawngṭaipuina an mamawh thu a sawi.

Hrangchalkawn Police Out Post-ah hian in-charge (I/C) inspector John Malsawmtluanga hoin thawktu - head constable pathum, constable pathum (hmeichhe pakhat telin) leh driver pakhat an awm dawn a; office bungraw mamawh hrang hrang bakah, lirthei (bolero) pakhat an kawl dawn a, Lunglei Police Station hnuaia khaw 63 awm ṭhin aṭanga khaw 20 chu Hrangchalkawn OP hnuaiah hian a awm tawh dawn a ni.