Thlai thar hralh chungchang sawiho

Mamit, Khawzawl leh Saitualah nimin khan an district bawrhsapte kaihhruaiin District Sensitisation on Thlai Thar Marketing an ṭhukhawm a; Bana Kaih (Handholding) policy hnuaia thlai thar hralh (marketing) chungchang an sawiho.

Mamitah chuan DC conference hall-ah district bawrhsap Jacob Lalawmpuia kaihhruaiin an ṭhukhawm a, Mizoram Agricultural Marketing Board (MAMB) member paliten an telpui.

He hunah hian thlai thar marketing-in a tum tlangpui leh hmalak dan turte thlirho niin, District Agricultural Marketing Committee (DAMC) mawhphurhna hrang hrang leh hmalak dan turte an sawiho bakah, zawhna leh chhanna hun hman a ni.

Khawzawl DC K Vanlal­ṭhiana hoin Khawzawla sorkar hotute leh MAMB member-te an ṭhukhawm a; thlai thar hralh dan tur kaihhruaina te, thlai chingtute aṭanga a leitute hnen a thlen dan tur te, collection centre aṭanga hralh dan tur te, DAMC mawhphurhnate leh thil pawimawh dangte sawiho a ni.

Saitualah pawh bawrh­sap Dr Lalngura Tlau kaihhruaiin an ṭhukhawm a; Bawrhsap chuan, "Sorkar ministry tharin thlai thar pali - sawhthing, aieng, Mizo hmarcha leh hmunphiahte lei tur a ruahmante rate hre saa loneituten hma an laka, sorkarin support price a pek theih chuan dinhmun sang leh ṭha zawkah an inhlangkai thei ang a, mi tinin an chhawr thei dawn ni," a ti.

Ṭhukhawm chuan Saitual district-a khaw hrang hrang 44-te FPOs/FPCss/SHGs rin zui theih turte an thlirho a; Handholding policy hnuaia District Horticulture Office-in village wise multi-purpose farming/co-operative societies din tawh 44 a rawtte pawm a ni.

Secondary Collection Centre atana district chhunga kudam leh market sheds awmsate rin ni se, an ti a; thlai thar hralh sèn loh tihralna tur processing unit din dan turte an sawiho bakah, society 44-te tana chairman leh secretary-te training neihpui dan turte an rel bawk.