Sorkar duh loh dana hma la leh rate zawm lote an lirthei permit cancel-sak theih an ni

Mamit district transport officer (DTO) Jerome Lalbiakdika chuan thuchhuah siamin, State Transport Authority-in lirthei chuan man (fare) a siam aia sang la an awm thu tarlangin, "Sorkar rate zawm lo emaw, sorkar duh loh dana hma la an awm a nih chuan an permit cancel thlenga hmalak theih a ni, " a ti.

Jerome Lalbiakdika chuan, tun hnaiah kawng chhiat leh tuialhthei man tihsan chhuanlama mihring phur chi lirthei chuan man tisang an awm nia hriat a nih thu a tarlang a, "Tuna lirthei chuan man (fare) kan hman mek hi March 12, 2024 aṭanga hman ṭan chauh a ni a, mipui tana rit lo tur leh lirthei neitute tan pawha na lo tura bithliah ṭhin a ni. State Transport Authority hnena mihirng phur chi lirthei permit diltute hian permit dilna form-ah sorkarin chuan man (fare) a bitliahte zawm turin an intiam vek," a ti a, permit diltute hian sorkar thu zawm turin hming an ziah hnan (sign) vek thu a tarlang.

Mipuite chu sorkar siam rate anga lirtheite hmang/chuang tura ngenin Mamit DTO chuan, "Sorkar rate zawm lo emaw, sorkar duh loh dana hma la an awm a nih chuan an permit cancel thlenga hmalak theih a ni," a ti bawk.