Thisen pek zirhonaah AVBD hruaitute an tel

Federation of Indian Blood Donors Organisations (FIBDO) leh National Institute of Biologicals (NIB) chuan nimin aṭang khan NIB Conference Hall, Noida-ah National Workshop and Conference of FIBDO (BLODCON 2024) an buatsaih ṭan a, Mizoram aṭangin Association for Voluntary Blood Donation (AVBD) hruaitute an tel.

Nimina zirhonaah mithiamte'n thisen pek leh a kaihhnawih thil chi hrang hrangte leh India ram dinhmunte an sawi. State hrang hranga blood donation kaihhnawih pawlte'na thlawna thisen pek dinhmun leh hmachhawp an neihte an sawi a; AVBD general secretary Lalrinkima pawhin Mizoram dinhmun tlangpui a tarlang.

Zirhonaah hian a thlawna thisen pekte state hrang hrangin an inpek tawn theih nan hmalak a ṭul thu te, National Blood Donation Policy hman mek chu a hlui tawh avangin tunlai mila siamṭhat a ṭul tawh thute leh sorkarin hma a lak a ṭul thute sawi lan a ni.

BLODCON 2024-ah hian state leh union territory 23 aṭangn voluntary blood donation lama hma latu pawl hrang hrang aiawhte an tel a; Mizoram aṭanga telte hi AVBD leh National Health Mission tirha kal an ni. BLODCON hi vawiin leh naktukah chhunzawm a ni ang.