Lunglei Municipal Council (LMC) inthlanpui hmasa ber chu naktuk hian neih a ni dawn ta a, campaign theih hun pawh nimin tlai dar 4 khan a tàwp. Naktuk zing dar 7 aṭanga tlai dar 4 thleng vote thlâk hun hawn a ni dawn a; vote thlak vek turin Lunglei municipal election officer Ramdinliani, bawrhsap chuan Lunglei mipui a ngen.

Lunglei Bawrhsap chuan, campaign hun tàwp hnuah campaign tawh lo turin political party, candidate-te leh election agent-te a lo hriattir tawh a; Lunglei páwn lam aṭanga campaign tura kal, Lungleia vote nei lote chu Lunglei chhuahsan turin a chah a ni.

Ramdinliani chuan, "Vote thlak hun tàwp, March 29, 2023 tlai dar 4 aṭanga chhiar lêta darkar 48, March 27, 2023 (Thawhṭanni) tlai dar 4 chhungin LMC huam chhungah campaign theih a ni tawh lo a, hemi hun chhung hian ward páwn lam aṭanga campaign tura rawn kal political hruaitu te, party worker-te leh campaign worker vote nei lote chu ward chhungah an awm tawh tur a ni lo," a ti.

Municipal Election Officer chuan LMC inthlanah vote neite chu vote thlak vek turin a sáwm a, "He inthlan hi Lunglei khawpui tan hun pawimawh bik tak a ni. Kan khaw chhung, Lunglei municipality chhunga kan roreltute kan thlanna hun tur a ni a, mipuite'n kan ngaih pawimawh a ngai hle a ni," tiin, ṭhahnemngai taka vote thlâk turin mipui a sáwm a ni.

LMC inthlana duty turte duty-na hmun tur pawh vawi thumna, 3rd Randomization of Polling Officials chu nimin khan Lunglei DC conference hall-ah neih a ni a; bawrhsap Ramdinliani, returning officer Donny Lalruatsanga, election observer Dr Lalngura Tlau leh election official-te leh political party aiawhte an tel.

Ramdinliani chuan, LMC inthlan atana inpuahchahna tluang taka a kal thu sawiin, hlawhtling taka inthlan a nih theih nan official-te leh political party aiawhte chu theihtawp chhuah turin a chah.

LMC inthlanah hian polling party 55 an awm a, nimina randomisation vawi thumnaah hian polling station 44-a duty tur polling party 44-te leh reserve polling party 11 thlan a ni a, political party aiawhte'n an pawt a ni.

Polling party-te duty-na tur chu anmahni hriattir a la nih loh bakah, puanzar a la ni lo a; vawiin chawhnu dar 1-ah Lunglei DC office aṭangin an duty-na tur pantir tur niin, chutah chuan an duty-na tur hriattir chauh a ni ang.

LMC inthlanah hian naktuk Nilaini zing dar 7 aṭanga tlai dar 4 thleng vote thlâk hun hawn a ni dawn a, vote thlâk turte chu an nihna tichiang thei identity card keng tura tih an ni a, voter ID (EPIC), Aadhaar card, PAN card, driving license leh ID rintlak dangte hman theih a ni.

Tarlan tawh angin, LMC inthlan turah hian voter 40,548 awmin, mipa 19,123 leh hmeichhia elector 21,245 an ni. Candidate 42 an awm a; INC, MNF leh ZPM-te'n bial tin chuhin, candidate 11 ṭheuh an nei a, BJP-in candidate pakua an nei bawk.