Sorkarin sum kan neih ang angin SEDP kan kalpui dawn - Chief Minister

Chief minister Zoramthanga chuan a kaihhruai sorkar flagship programme, Socio Economic Development Programme (SEDP) chu sorkarin sum a neih ang anga kalpui a nih dawn thu a sawi.

Champhai journalist-te aṭanga thu dawn danin, March 26, Pathianni tlai khan Champhai Circuit House-ah CM Zoramthanga hi Champhai North & South-a MNF hruaitute nen an inkâwm a; Zoramthanga chuan, SEDP ṭanpuina chu a dawng tawh chhungkaw 60,000-te'n an dawn chhunzawm dawn bakah, chhungkaw 60,000 dang hnenah pek leh a nih dawn thu a sawi a, "Sorkarin sum kan neih ang angin SEDP kan kalpui dawn a, bial hrang hrangin an chan zat tur erawh chu uluk zawka kan bituk a ngai ang," a ti.

Chief Minister chuan, Special Assistance to States for Capital Investment (SASCI) sum dawnte chu MLA bial tinah cheng nuai 700 ṭheuha sem sawm a nih thu sawiin, "Hnathawh tur ruahmanna lian tham deuh, mipui tana ṭangkai thei tur ber thawh tur uluk zawka ngaihtuah a ṭul," a ti a; sorkar kum 2023-24 atan SASCI sum dang a rawn kal leh thuai dawn niin a sawi.

Zoramthanga chuan, kumin kum tàwp lama Assembly inthlanpui awm tur chungchang sawiin, "MNF party chuan seat 30 tal a lak kan inbeisei a, Congress party chu an artelukàwn loh vêk pawhin seat hnih/khat bâk an lak a rinawm loh. BJP-in bial pahnih/khat an chang ve mai thei," a ti.

ZPM chungchang sawiin MNF President chuan, "Kum 2018 khan an inhàm puar vak a, Congress ni lo, MNF ni lo sorkar siam a ngai tiin, party pawh kan ni lo a, movement kan ni. Kohhran hi kan unit a ni tia insawiin sorkar khalh ngil turin VUC kan nei an ti a. Tunah chuan kalphung thar an tih hi mipuiin kan nuihzat tawh," a ti a, 'Min chhin ve teh u' ti ṭhinte chu mipuiin MLA 10 pawh an la pe ngai lo niin a sawi.

CM Zoramthanga chuan, PAHOSS hnuaiah Champhai P/S-II hmunah sikul awm sa tibo loin cheng vbc. 7.5 sêngin multi-level car parking siam tum a nih thu leh sum a awm sa vek tawh thu a sawi a; Chhangphut Field-ah zan lama inkhelh theih turin hmalak a nih dawn thu te, Tlangsam-Zotlang inkar kawngpui alkatra luanna turin cheng nuai 400 ruahman a nih thute a sawi bawk.