Sanghaah ṭan lak zual a ngai - Governor

Governor Hari Babu Kambhampati chuan nimin khan Raj Bhavan-ah Fisheries department hotute a kâwm a; Mizoramin sangha ei tur kum chanve chhung daih bâk a la thar loh avangin ṭan lâk lehzual a ngaih thu a sawi.

Dr Hari Babu Kambhampati chuan, "Tunah hian Mizoramin kum chanve daih bâk sangha a la thar lo a, ṭan lâk lehzual a ngai. Mizoram mipui ei khawp tal chu tun aṭanga kum 2-3 ah chuan thar a ngai a, hatchery neitute department mithiamte'n an vil uluk a ngai," a ti a; sorkar enkawl demonstration fish farm-ahte kut hnathawktute zirtirna kalpui a nih rualin, sangha no tam tham zawk thar tuma ṭan la turin a chah.

Mizoram budget aṭangin Fisheries department-in thawktute hlawh tur deuh chauh sum a nei tih sawiin Larsap chuan, "Sum leh pai indaih lohna avanga Mizoram sorkar aṭanga hna thawhna tur sum a awm loh pawhin, sangha khawitute hmalakna pui turin bank lam dàwr theih a ni. Sum awm lo chunga Fisheries department hlawhtlinna a fakawm," a ti.

Fisheries department hotute tarlan danin, sorkar enkawl fishery demonstration farm panga awm mek a, chu'ng zinga ṭhenkhat chu Fisheries department vilpuina hnuaiah mimal enkawltir tum a ni. Mimal ta sangha no piantirna leh tihpunna hatchery pakua a awm mek a, Fisheries department-in a hriatpui vek a ni.

Inkawmhonaah hian Fisheries secretary Laldawngliana leh director F Vanlallawma bakah, hotu dangte an tel.

ṬHUTKHAWMA TARLANTE
▶ Mizoramah sangha khawi theihna ram hectare 24,000-a zau a awma chhût a ni.

▶ Sangha khawi theihna zau zawng aṭanga 22.10% chauh hman ṭangkai a ni.

▶ Mizoramin kum khatah sangha metric ton 13,000 vel a mamawh.

▶ Kum 2022 khan Mizoramah sangha metric ton 4,575 vel thar a ni.

▶ Chhungkaw 16,588 velin sangha khawi leh sangha notê kaihhnawihah hma an la.

▶ Chungkaw 6,283 chu sangha man (capture fishery)-a ei zawng an ni.

▶ Chhungkaw 11,204 chu fishery huanga ei zawng an ni.

▶ Chhungkaw 30,150 velin fishery sector aṭangin sum an la lut.