“Zui tlâk ka ni” - Lalsawta
Mizoram Pradesh Congress Committee (MPCC) president Lalsawta chuan, amah chu zui tlâk a nih thu nimin khan Lungleiah a puang a; Mizoram chu siamṭhat theih a nih thu leh siamṭhatna tura damdawi ṭha ber chu sorkar ṭha a nih thu a sawi.
Lalsawta hian nimin khan Lunglei Press Club-ah thuthar thehdarhtute kâwmin, "Ka kal tumna hi ka hria a, Mizoram mipui hruai ka tumna ka hre bawk. Ka kal tumnaa kal tura tàwn tlang ngaite chu Pathian leh political will hmangin ka su tlang bawk ang. Zui tlâk ka ni, a chhan chu ram tana tih tur ka hriat vang a ni. Pathian leh mipui puihnain kan sorkar ngei ka ring," a ti.
MPCC President chuan, "Kan ram chhiatna leh dam lohna thiam taka sawi ṭhinte hi thusawi thiam kan tihte an ni ta mai a, a damdawi an sawi ngai si lo. Kan ram damdawi chu sorkar ṭha a ni. Pathianin mipui ṭha leh ram ṭha min pe," a ti a; beidawnna thlentu ni lo a, beiseina leh rinna petu nih chu Pathianin mihring a din dan a nih thu a sawi.
Lungleiin bial mipui thlavâng hauh ngam MLA a mamawh tih sawiin Lalsawta chuan, "Tuna ruling MLA-te hi kan CM hian a seh dawn lo, mahse, an hlau em em a, an hlauh chhan ka hre lo. Anmahni thlangtu mipui aia CM an hlau hi MLA ṭha leh huaisen an nih lohzia tichiangtu a ni. RT-PCR an mamawhna pawh aupui ngam lo. Lunglei mipui thlavâng pawh hauh ngam lo khawpa an awm hi a mak. Kan sorkar chuan tu pawh CM ni se, kan ruling MLA-te chu an diknaah chuan an huaisen hle tur a ni," a ti.
Congress party President chuan, "Urban Employment Guarantee Scheme siam kan tum. Lunglei mipui rethei zawkte inhlawhna tur budget-ah kan dah vek tawh MNF-in an tih hi thu dik lo a ni. 2023-24 budget Demand for Grants en ula, hetiang pawisa hi dah a ni lo. Politics hi duh tâwka dâwt sawi theihna tur emaw kan ti ṭhin a, a ni lo," a ti a; Lunglei chungchang leh Aizawl aṭanga Assam Rifles insawn chungchangah ram hruaitute'n dâwt an sawi reng ṭhin niin a sawi.
Lalsawta chuan, "Pawi ka tih em em chu, LMC inthlan vuakvêta sum leh work order hmanga lei tur zawnga mi ṭhenkhat an vak huai huai hi a ni. Lei theiha mipui min ngai tlat hi a vanduaithlak. Hawh u, sal leh nawhchizuar ang maia lei theihin i awm lo ang u," a ti a; sum leh therhlo hmanga lei theiha awm lo turin Lunglei mipui a chah a ni.