KHAWTHLIR

Candidate puang

ZPM president Lal-liansawta chuan April 19, 2023-a Zemabawk local council by-election neih tura ZPM party candidate turte nimin khan a puang a, mipa panga leh hmeichhia pahnih an ni. Lalliansawta chuan, "Zemabawk LC by-election atana mi ṭha tak tak candidate kan nei hi a lawmawm hle. Inthlana thil ṭha lo deuh mai kan hriat tel ṭhin chu sum leh pai hmanga inthlêmna a ni a, thil pawi tak a ni a, he thil hi tihreh vat a ngai a ni," a ti.

Kuhva rah man

March 26, Pathianni zan khan Serchhip Sailiamkawn checkpost-a police duty-te chuan truck pahnih aṭangin Myanmar aṭanga dan loa lak luh nia hriat kuhva rah ip 190 (kg. 6,650 vel) an man a, Lungleia Customs hnenah an hlan. Kuhva rah phurtute chu Hose Zirthantluanga (25) leh Lalnuntluanga (28), New Champhai ve ve nia inchhál an ni.

T Sailo thlànah pangpar dah

Nimin March 27 kha chief minister hlui Brig. T Sailo thih champha vawi riatna a ni a, a thlànah PC party chuan an president Vanlalruata hoin nimin khan zahna chibai bûkin pangpar an dah. Brig. T Sailo hi Vanglaini buatsaih Mizo Award hmasa ber (2011) dawngtu a ni a, Padma Shree leh chawimawina dang eng emaw zat a dawng tawh bawk.

Anaemia Camp

Women & Child Development, Child Development Project Office leh Health department chuan nimin khan Serchhip CMO conference hall-ah millet (buhtun) ṭhatzia leh anaemia vênna ṭha a nih dan inzirtirna, Anaemia Camp an buatsaih a, Anganwadi centre-a thawkte leh tleirawl kum 14-18 inkarte an tel a, an hemoglobin endiksak nghal a ni.

IAS dah turin ngen

MSU hruaitute chuan nimin khan DPAR enkawltu dy. chief minister Tawnluia leh Education minister Lalchhandama Ralte te an pisaah hmuin; Education department director chu IAS post-a nih angin, IAS ngei dah turin an ngen.

Thisen pe

KṬP, North Vanlaiphai Damdawi Veng Bial chuan nimin khan Serchhip District Hospital tan thisen unit 42 an pe a, petute mipa 31 leh hmeichhia 11 an ni. Nimina chhuak Vanglainia thisen pe tarlanah, General PYD (NEI) tih chu Mizoram PYD tih zawk tur a ni.