Mipuiin MNF sorkar paih thlak an duh tawh hle - Zodintluanga

Mizoram Pradesh Congress Committee (MPCC) treasurer Zodintluanga Ralte, MLA chuan nimin khan press statement a tichhuak a, mipuiin MNF sorkar paih thlak an duh hle tawh niin a sawi.

Zodintluanga Ralte chuan, LMC inthlan boruakah chawlhkar khat dawn Lungleiah a chàm thu sawiin, "Mimal in hrang hrang, dàwr hrang hrang leh bazarahte ka léng kual nasa a, chuta ṭang leh mi titi aṭanga ka hriat chian em em chu - MNF paih hrim hrim an duh tih a ni," a ti.

MPCC Treasurer chuan, MNF mi leh sa tam tak a kâwm tih sawiin, CM Zoramthanga’n Mizoram a hruai dan leh Robert Romawia Royte nena ram an suasam dan an hmuhin, LMC leh MLA inthlanpuiahte MNF vote an tum tawh loh thu an sawi nasa hle niin a sawi.

ZPM leader Lalduhoma'n, 'Sorkar hnathawkte chuan an lo eiru a ni thei a, a ziaawm ka ti, anni chuan ram tan an ti hleinem, anmahni tan a lawm lehkha an zir, officer nih an tum a, mahni hmasiala rawn kal chho kha an nia' tiin a sawi nia tarlangin Zodintluanga chuan, "Sorkar hnathawkte hi eiru tur leh ram hmangaih loah a chhuah che u a ni," a ti.