Internet kaltlanga inbumna a hluar; Police-in fimkhur turin mipui an chah

Mizoram Police chuan thuchhuah siamin, tunlai hian online/internet kaltlanga inbumna a hluar thu an tarlang a, finkhur turin mipui an chah.

Police thuchhuah chuan, internet kaltlanga inbumna zingah - sipai anga inchhál, an thlalak - identity card, adt. daha mi bum chíng an tam tih a tarlang a, "Heng mite hian bungraw hrang hrang - motor, bike, in chhung bungruate zuarin a man an dawn hnuah an bungraw zawrhte a leitu hnen thlen loin an bibo ṭhin. Sipai tana ei tur (sangha, sa chi hrang hrang, cake, balhla, adt.) order derin, a zuartute an bum ṭhin bawk," a ti.

Mizoram Police chuan, internet kaltlanga bum tâwkte tan Cyber helpline number 1930 biain emaw, www.cybercrime.gov.in ah ziakin emaw zualko theih a nih thu a tarlang bawk.

POLICE THUCHAH
▶ Bank account-a pawisa lut turin six digit UPI PIN - GPay, BHIM emawah pek a ngai lo; PIN pek ngai titu chuan bum che a tum a ni.

▶ Online kaltlanga sumdawnna (Instagram, Facebook, WhatsApp business) zingah misual ṭhenkhat mi bum tumin sumdawnna an kalpui.

▶ Online kaltlanga sumdawnnaa bungrua lei/chah hmain a dawr tawhtute comment leh dawr neitute leh pawisa pekna tur account hming/address a inmil em tih enfiah hmasak tur.

▶ A man pangngai aia tláwm uchuak lutuka bungraw zawrhte hi inbumna a ni duh hle.

▶ Online dealership, distributorship, adt. pe thei anga insawi tam tak hi inbumna a ni tlangpui.