Mipui sorkar leh kalphung thar ṭha zawkin ram siam kan tum - ZPM President

ZPM president Lalliansawta chuan, ZPM party chuan Mizoram siamṭhat a ngai a ni tih hriain mipui sorkar leh kalphung thar ṭha zawkin ram siam an tum thu sawiin, Mizoram siamṭha turin ZPM aṭanga hna thawk turin mipui a sáwm.

Nimina ZPM pisaa inkhawmah thu sawiin Lalliansawta chuan, "ZPM hian kan ram hi siamṭhat a ngai a ni tih hriain kan rama mipui sorkar leh kalphung thar ṭha zawka ram siam kan tum. Intodelh lo, eng sum mai pawh khu lam sum ringa khawsa nih reng hi kan ram tan a tâwk tawh lo. Chhungkaw zahawm leh intodelh kan nih hun hi kan thlir a, kan ram siamṭha tur hian ZPM aṭangin hna i thawk ang u," a ti.

ZPM President chuan, ram siamṭhatna tura thawhpui tur an nei zel chu lawmawm a tih thu a sawi a; Lunglei Municipal Council inthlan tur chungchangah, "Kan ram hi mi pamhamte’n an palzût mai mai loh nan leh sum leh therhlo hmanga mahni zahawmna hralh lo turin Lunglei mipuite ka ngen a ni," a ti a, sum leh therhlo ûma vote thlâk lo turin Lunglei mipui a ngen a ni.

MLA Lalchhuanthanga pawhin thu sawiin, "LMC inthlan turah kan party-in candidate kan nei ṭha a, kan zâm lo. Kan thawh pawh rah ni loin, ruling hnathawh mumal awm lo hian ZPM a tilian a, LMC-ah sorkar ngei kan inbeisei. Kan sorkar hrawn mek hian sum hmatheha vote zawn chiah tih thiam an nei a, an hnathawh hmanga mipui ngaihzàwn an hlawh lo a ni," a ti.