August 2023-ah SEDP Phase-II sum nuai 30,000 sem zawh tum

Socio Economic Develop-ment Programme (SEDP) thawh hnihna (phase II)-ah mi 60,000 hnena sum sem tur cheng nuai 30,000 dah a ni a, August 30, 2023 ral hmain sem zawh tura tih a ni.

Nimin khan Aijal Club-ah SEDP Executive Board an ṭhutkhawm a, Board chairman Tawnluia, deputy chief minister chuan, "SEDP Phase-II atan hian cheng nuai 30,000 dah a ni a, August 30 ral hmain phase II ṭanpuina second instalment sum pek tlak vek tur a ni. Phase I-a beneficiary tam zawkte pawhin ṭanpuina sum second instalment Rs 25,000 ṭheuh an account-ah an dawng mek," a ti.

Tawnluia chuan, sum renchem a ngaih avangin SEDP phase II-a administrative cost tihhniam rawtna chu thil ṭul nia a ngaih thu a sawi bawk.

Ṭhutkhawmah hian SEDP kalpuitu sorkar department te, district-a SEDP committee leh local/village-a SEDP committee-te tana SEDP phase II-a administrative cost tihhniam rawtna pawm a ni.

Sorkar thuchhuah tarlan danin, SEDP phase II-ah mi 60,000-in ṭanpuina Rs 50,000 an dawn tura ruahman a ni a, instalment hnihin, Rs 25,000 ve vea pek tum a ni. Phase I second instalment chu beneficiary tam zawkin an dawng tawh.

Ṭhutkhawmah hian Planning Board vice chairman H Rammawi, SEDP Board ṭhenkhata vice chairman (MLA) paruk - Lalrintluanga Sailo, C Lalmuanpuia, Ramthanmawia, H Lalzirliana, Zothantluanga leh Prof. F Lalnunmawia bakah, Planning department leh SEDP kalpuitu department director-te an tel a ni.