World Theatre Day hman a ni

Nimin khan Assembly Annexe conference hall-ah Art & Culture minister R Lalzirliana hoin World Theatre Day hman a ni.

AR & Culture Minister chuan lemchan lamah duhthusamin kan la thleng sang tawk lo tih sawiin, "Amaherawhchu tun hnai kum 5 chhung erawh chuan hmasawnna kan hmu chho zel a, hmanrua lamah leh a changtute pawh talent nei ṭha tak tak an awm chho a, a lawmawm hle a ni," a ti.

Rei loteah lemchan chu eizawnna tlak a nih a la beisei thu sawiin R Lalzirliana chuan, Mizo Drama Society chu theihtawp a hma la zel turin a fuih.

Mizo drama chhuakthar turte chu hnamzia leh nunphung pho chhuah na lam a tam thei anga zeh tel theih ni ṭhin se a ṭangkai tur thu sawiin Art & Culture Minister chuan, "Lemchan chu mi rilru hneh tak a nih avangin kan thuziak leh kan chan danah te kan fimkhur a pawimawh a ni," a ti bawk.

World Theatre Day-ah hian Mizo Drama Award 2023 sem a ni a, award hi Dr Laltluangliana Khiangte hnenah hlan a ni.

World Theatre Day lawmna hun hi Mizo Drama Society, Department of Mizo and Culture Studies (ICFAI University), Department of English (ICFAI University) leh Department of Mizo (Mizoram University)-te ṭangkawp buatsaih a ni.