Sorkar tharah awmze nei takin SEDP kan kalpui dawn - Dr Thangtea

MNF adviser Dr R Lalthangliana chuan nimin khan LMC inthlan atana campaign-in Lunglei Venghlun leh Lunglawnahte thu a sawi a, "SEDP tuna kan inpek dan hi kan tum lâwk dan a ni lo, a beitham kan ti. Tu sorkar mahin a tawrh ve loh Covid-in hun rei tak min nuai a, kumin ral se, sorkar tharah awmze nei takin SEDP kan kalpui dawn," a ti.

Dr R Lalthangliana chuan, budget la khawih ngai lote'n LMC piang tur chu kalpui ngaihna an hre dawn lo nia sawiin, "MNF LMC a pian chuan model LMC kan din dawn," a ti a; Congress, PC leh MNF sorkar kal tawh leh sorkar lai beih ringawt, an thil tih ṭhat sawi duh lo, a chhe lai ringawt sawi an awm nia sawiin, Mizoram chu chhe lailet dêr anga sawi chu ṭha a tih loh thu a sawi.

MNF Adviser chuan, MZU Southern Campus din turah a hmunhma tihfel a ni tawh a, DPR an siam tawh thu sawiin, "Thawktu tur lâk leh building sak turte pawh Central-in Covid nghawng avangin min pe thei rih lo a, hmannia Delhi ka zu kal khan ka nawr nawn leh a, a fel thuai ang," a ti a; Lunglei by-pass road atan cheng vaibelchhe tam tak ruahmanna siam chu NHIDCL hnenah tender pek tawh a nih thu a sawi bawk.

MNF adviser dang Lalruatkima pawhin nimin khan Lungleia Mizo Hnam Rûnah LMC campaign khârna inkhawm hmanpuiin thu a sawi a, "Lunglei mipui rilru kan lo hliam tawh zawng zawngah thupha kan chawi a ni," a ti.

Lalruatkima chuan, "Kan theih ang angin Lunglei mipui tan hma kan la ve ṭhin nia kan inhre chungin, Lunglei mipuite duhkhawp kan ni lo tih kan hria. Lunglei mipuite rilru kan lo hliam tawhna zawng zawngah Pathian hmingin thinlung takin thuphá kan chawi a, kan hliam hluite dam se kan va ti em," a ti a; Lunglei changkang zawk leh hmasawn zawk dinpui turin Lunglei mipui a sáwm a ni.