AR hmuna ram neitute insawifiah turin Revenue department-in an hriattir

Aizawl khawpui lailia Assam Rifles hmuna ram neitute chu Land Revenue & Settlement (LRS) Director chuan tun hnai khan insawifiah turin a hriattir a, insawifiahna atan ni 30 chhung hun a pe.

LRS Director hian March 24, 2023 khan Assam Rifles hmuna LSC leh house pass neitute chu show cause notice a pe a, The Mizoram Land Revenue Act, 2013 Section 33(2) tlawhchhanin insawifiah turin a hriattir a ni.

Mizo District Land Revenue Act, 1956 Section 8-na tlawhchhanin mimalin ram neih theih a ni lo tih tarlangin LRS Director chuan, Revenue officer-te thu dik lo hmanga bum vanga lo nei ve ngawtah a puh.

Land Revenue & Settlement Director chuan, Assam Rifles hmuna ram neih chuan The Mizoram (Restriction on Use of Transferred Land) Act, 2002 a kalh niin a tarlang bawk.

LSC leh house pass neitute chu an ram an neih dante sawifiah a, an LSC leh house pass-te tihtawp (cancel) a nih loh chhan tur chiang taka tarlang tura hriattir an ni.