ZPM working president K Sapdanga chuan nimin khan an pisaah thuthar thehdarhtute a kâwm a; Tuirial biala MLA by-election neih tura Mizoram People Forum (MPF) hmalakna fakawm an tih thu sawiin, "Kan party chuan vote zawnna atan sum sem kan hmatheh ve dawn lo," a ti.

MPF fakawm an tih thu sawiin K Sapdanga chuan, "Inthlan puan aṭangin bial chhung luhchilhin, inthlanna felfai tak a awm theih nan theihtawp an chhuah. Ṭan bik leh huat bik nei hauh loin zilh ngai apiang min zilh a, party tinte pawhin kan véngthâwng tlang viauin a lang. MPF avang hian Mizoram hi India ram puma inthlanna thianghlim leh felfai bera puan kan lo ni tawh," a ti a; hun tlemtê la awmah MPF chu khauh zual se, party leh mipui tan a ṭhat tur thu a sawi.

ZPM Working President chuan an khingpuite fakin, "Kan khingpui pawl upa zawkte leh an candidate-te an hawihháwm a, hmuh hrehawm leh ngaihthlak hrehawm zawngin tu pawl mah kan inbeiin kan inpuhchhe tawn lo. Kalphung thar kan lo aupui ṭhin kha kan khingpuite hian min ṭâwmpui ve sâwt hle niin kan hria a, lawmthu kan sawi a ni," a ti.

K Sapdanga chuan, Andrew H Thangliana aiawh tur thlanna atana vote thlak hun chu ni riat chauhin a dang tawh tih sawiin, "Tlin inring pawl zingah ZPM hi kan naupang fál hle. Mahse, he bialah hian party politics âtchilh lo, fím taka thlir thiam an tam em em a, chung mite hawi lam apiang chuan hnehna an chang leh ngei ang," a ti a; kum 2018 inthlanpuia hnehna petute'n vanduaina an tawh achungah khaw dang an hawisan an rin loh thu a sawi.

ZPM candidate Laltlanmawia chu kum 46 mi, Kristian chhungkuaa seilian a nih thu sawiin Sapdanga chuan, "Kohhran ṭhalaiah leh kohhran puiahte rawngbawltu a ni a, mi thilphal, mi khawngaih thei, tlawmngai tak a ni. Pu Andrew H Thangliana sûlhnu chhui turin ṭha berah kan ngai a, amah pawhin a inngai. Kan dinhmun min hriatpuia khawngaih vote lo pe turin Tuirial bial mipuite tih tak zetin kan ngen a, a symbol chu 'Lukhumparh' a ni," a ti.

Zawhna chhangin K Sapdanga chuan, ZPM-a telte chu mihring ve tho an nih avangin an thianghlim bik lo tih a sawi a, "Dan pawh kan zâwm famkim hauh lo. Dan zâwm tura infuih nasa ber erawh kan ni ang. ZPM-a awmte hi mi hlui leh tharte kan ni a, a thar ber chu a principle hi a ni. Vote zawnna atan sum sem kan hmatheh ve dawn lo, tlinpui dawn pawh ni ila kan duh lo," a ti a; sum sem hmatheh chu mipui rilru hruai dik lohna leh thatchhiat inzirtirna a nih thu a sawi.

ZPM Working President sawi danin, Tuirial biala khaw hrang hrang sûkthlêk aṭanga a lan danin, mipuite'n thil pahnih an bûk a ni. Ṭhenkhatin 'Hun tâwitê atan ruling MLA neih ve hrim hrimna remchang atan hman a ṭha ang,' an ti a, ṭhenkhatin 'Thihna avanga he by-election hi lo awm a ni a, chhiat tâwk pawlte hi kan sûnpuina leh ràlna atan lusûn pawlte vote pek hi a Mizo a ni,' an ti. 'ZPM hi 2023-ah ruling ni tawh tura rinkai an nih vangin tuna thlan tlin hi a ṭha mai' ti pawl pawh an awm.

K Sapdanga chuan, Tuirial by-election chu inthlanpui ang hrima political party-te'n an ngaih hlawm thu sawiin, "Keini pawl phei chuan candidate mimala innghat mai loin, unit leh block-te thawh turin kan inngen a, khaw hrang hranga kan mite a remchang apiangin sum an thawh khawm. Kan party mi ni lo, an hming puan chhuah rem chiah lo rawn thawhte pawh an awm," a ti a; bial pawn aṭanga sum leh thâ thawhtute chungah ZPM an lawm hle tih

a sawi.