Rimawi leh zai lamah MYC-in MoU ziak

Mizoram Youth Commission (MYC) chuan, Mizo ṭhalaite'n rimawi leh zai hmanga eizawnna tlak an neih theihna tur leh chawikanna turin nimin khan MYC Conference Hall-ah Music Connect Asia chu thawh dunna thuthlung an ziahpui.

Memorandum of Understanding-ah hian MYC aiawhin chairman Dr Vanlalṭanpuia, MLA-in a ziak a; Music Connect Asia aiawhin acting president Kaushik Dutta-a'n hming an ziak.

Centre for Creative Excellence aṭangin Bollywood lama producer Shubho Shekhar leh a nupui Sucheta te an tel bawk.

Sorkar thuchhuah tarlan danin, MoU hmang hian Music Connect Asia leh MYC chuan mimal leh band chawikanna tur te, training neihna tur te, festival liana pho chhuah an nih theihna tur leh eizawnna atana an hman theihna tura hmalakna kawngahte an thawkho dawn a ni.

Centre for Creative Excellence for Indian & Western Music nen Mizo ṭhalai talent nei ṭhate dap chhuah a, eizawnna tling tura training pek te, Indian music industry-a hnim luhte leh Bollywood-a eizawnna tur dap kawngahte an thawk dun dawn bawk a ni.