Advertisement tel loa lâkte bàn phûtin MSO-in MADC pisa kai turte an dang

Mara Students’ Organization (MSO) Headquarters, Siaha chuan Mara Autonomous District Council (MADC) hnuaia thawk tur advertisement chhuah loa kum 2020-2021 chhunga thawktu lâkte bàn an nih theih nan nimin aṭang khan MADC pisa kái tur an dang. Pisa kái tur dan hi tiamchin awm lo a ni.

Hna lak chungchangah hian MADC thuneitute chuan MSO hruaitute hnenah an hna lak list an pek tawh thu an sawi a; MSO hruaitute chuan RTI Act hmanga zawhna an siam chhanna an pek chu a kim lo nia an hriat avangin chhanna kim pe turin an phût a ni. A hlawhtlin hma chu pisa kai tur dan chhunzawm zel an tum thu an sawi.

MSO chuan thuchhuah siamin, Mara-te'n MADC-ah chanvo rualkhai zawk an neih theihna turin Chief Executive Member (CEM) hnenah kum 2020-2021 chhunga MADC-a advertisement chhuah loa thawktu lâkte bàn turin ziakin vawi hnih an ngen tih an tarlang a, "A hlawhtlinna kan hmu lo. Kan lungawi lohna lantir nan leh advertisement chhuah loa lakte bàn an nih theihna turin thu leh awm hma chu MADC office-ah picketing neih ni se kan ti a ni," an ti.

Mipui office dawr turte harsatna an siam ang tih an hriat thu tarlangin MSO chuan, lo hrethiam hram hram turin mipuite an ngen.