ASF vangin vawk 29,442 thi tawh

Vawk pùl hri, African Swine Fever (ASF) avangin nimin thleng khan Mizoramah vawk 29,442 a thi tawh a, khua/veng 271-ah ASF a léng tih finfiah a ni tawh. Nimin bikah ASF vangin vawk 28 a thi a, vawk pakhat tihhlum (suat) a ni.

Animal Husbandry & Veterinary department-in report an dawn chinah, ASF vangin Mizoramah vawk 29,442 a thih tawh laiin, ASF lènna (infected area)-ahte vawk dam lai 47,403 a la awm. Nimin thleng khan ASF infected area-a puan ni lo khua/veng 95-ah chhan hriat loa vawk thi 510 a awm tawh.

Nimin thleng khan ASF lênna nia rinhlelh khua/veng pasarihah vawk 190 suat a ni tawh a, ASF infected area-a vawk suat tawh 10,190 a ni, Mizorama vawk suat tawh zawng zawng chu 10,380 a tling.

Aizawl district chu ASF infected area leh ASF vanga vawk thi tamna ber a ni a, Mizoram puma infected area zinga 41.32% leh vawk thi zawng zawng zinga 41.53% chu Aizawl district-a mi a ni. Serchhip district chu ASF vanga vawk suat tamna ber a ni a, Serchhip district-a ASF infected area 35 zinga 30-ah nimin thleng khan vawk 3,040 suat a ni tawh.

Serchhip district-a Thenzawl khua chu Mizorama ASF vanga vawk thi tamna ber khua a ni a, nimin thleng khan Thenzawl khuaah ASF vangin vawk 921 a thi tawh a, vawk 615 suat tawh a ni.

Mamit district-a Léngte khua chu Mizorama ASF vanga vawk suat tamna ber khua a ni thung a, nimin thleng khan Lengte ah vawk 2,033 suat tawh niin, chu chu Mizoram puma vawk suat tawh 10,380 aṭangin 19.58% a tling. Lengteah hian ASF vanga vawk thi 560 a awm tawh bawk.

AH&Vety department chuan, chhan hriat loha vawk leh sanghal thi a awm chuan phone number 8731975444 leh 8974027269-ah hriattir zel turin mipui an ngen a ni.