Tih theih loh tur ka intiam ngai lo - Chalrosanga

Tuirial bial by-election-a INC candidate Chalrosanga Ralte chuan nimin khan Thingdawla mi thar lawm luhnaah thu sawiin, "Thil hi ka intiam ve vak vak ngai lo. Kan tih theih tur chinah chuan kan ti ang ka ti mai a, kan theih loh tur thilah chuan kan intiam ve ngai lo," a ti.

Chalrosanga Ralte chuan, politics chu mahni eizawnna atana ngaitu chu a hlawhchham nghal tih sawiin, "Kei leh ka chhungte hi chuan eizawnna atan kan hmang ve dawn lo a, politics hi bial mipui tana malsawmna ni turin kan hmang dawn a ni," a ti a; an tih theih loh tur an tiam ve ngai lo tih hriatsak turin mipui a ngen a ni.

Thu sawitu dang MPCC general secretary Lal Thanzara chuan, "India ram Hindu lal rama siam tumtu BJP thawhpuitu chu tuna Mizorama rorel lai MNF hi an ni," a ti a; Congress party erawh chu Kristian pachalin a din a nih thu leh India ram hmasawnna tam tak thlentu chu INC a nih thu a sawi.

Lal Thanzara chuan, Lengpui Airport siamtu chu Congress sorkar a nih thu sawiin, "Tuirial Hydel Project tung ding tura Pathianin a ruat chu Congress party kan ni a, MNF-in an sawpchhiat vek tawh Referral Hospital din thar leh a, doctor zir theihna tur medical college ṭha tak dintu chu Congress party tho kan ni. Thil tak takah chuan Congress party bawk hi Mizoram tan Pathianin a hmang ṭhin," a ti.

MPCC general secretary PC Lalthanliana pawhin thu sawiin, an party candidate Chalrosanga Ralte chu thlan tlin a nih chuan nasa takin Tuirial bialin hma a sawn phah dawn thu a sawi bawk.