Link road laih kan chhunzawm zel ang - Laltlanmawia

Tuirial bial MLA by-election neih tura ZPM candidate Laltlanmawia chuan, feh kawng (link road), tui dah khawlna leh lui kalpawhna kawngte a ngaih pawimawh thu a sawi a, "Ka tling emaw, tling lo emaw, agricultural link road laih kan chhunzawm zel ang," a ti.

Laltlanmawia chuan, Tuirial bial chhunga chêng tam zawkte chu kut hnathawk an ni tih sawiin, "Thlan tlin ka nih chuan kut hnathawktute hi ka ngaih pawimawh tur an ni," a ti a; bial chhunga lui - Tuirial, Serlui Tuichhuahen, Tlawng, Chemlui leh Ṭialpui-te chu chhawr thiam chuan thlai thar leh sum lak luhna nasa taka tipungtu a nih theih thu leh chutiang tur chuan khaw hrang hrangin awlsam zawka lui an pawh theihna tur kawng siam a ṭul thu a sawi.

ZPM Ṭhalai chuan, Laltlanmawia hian politics a luhchilh hma pawhin agricultural link road laih a ngaih pawimawh avangin Tuirial bialah hma a la nual tawh tih an tarlang a, "Inthlan hmaa bial chhung hmun hrang hranga agricultural link road a laihte chu inthlan boruakin a phuar avangin a chhunzawm thei lo a, laih chhunzawm thuai a nih tur thu a sawi a ni," an ti.