Central BJP-in Mizoram BJP thu an ngai pawimawh - BJP Vice President

Mizoram BJP vice president JB Rualchhinga chuan nimin khan an pisaah thuthar thehdarhtute a kâwm a; central BJP sorkarin Mizoram BJP hruaitute sawi an ngai pawimawh ṭhin niin a sawi.

JB Rualchhinga chuan, October 19, 2021-a Guwahati aṭanga Aizawl pan tur Alliance Airlines chu technical thilah harsatna a awm avangin cancel a nih thu leh Mizoram pan tur mi 21-te'n harsatna an tawh thu a sawi.

Harsatna chung-changah Civil Aviation Minister PS a biak thu sawiin Rualchhinga chuan, "Ani'n hma min laksak nghal a, Union minister Gen. VK Singh beng a thleng a, North Eastern Region Authority-te instruction hmanhmawh takin a pe nghal a, Mizo mipui tangkhangte tan five star hotel-ah riahna leh chaw min pek bakah, a tukah special flight min ruahmansak nghal a ni," a ti.

JB Rualchhinga chuan, Gen. VK Singh-a'n Mizo mipui a ngaihsakna leh him taka an awmna tura an hmalakna ropui a tih thu sawiin, "Central BJP hruaitute hian keini Mizote hi min en hrang lo a, min duhsak em em a, min ngai pawimawh hle a ni tih Mizoram mipuite'n hria se kan duh," a ti a; Mizote'n harsatna an tâwk a nih chuan Mizoram BJP hruaitute an awm reng tih a sawi a ni.