Saitual DRDA pisa sak tur lung phûm

Rural Development (RD) minister Lalruatkima chuan, nimin khan Saitual District Rural Development Agency (DRDA) pisa sakna tur lungphùm a phúm a, Thingsulthliah BDO Complex-a hnathawh mek a enfiah bawk.

Lalruatkima chuan, RD department chu Mizoram sorkara department pawimawh ber zinga mi a nih thu sawiin, "Thingtlang hmasawnna turin theihtawp chhuahin ke a pên a, eibâr kawngah leh mahni kea ding thei turin SHG leh VO member-te tan hma tam tak lak mek a ni," a ti.

Eizawnna mumal nei lote tan ni 100 inhlawhna kalpui mek a nih thu sawiin Minister chuan, "Covid-19 hripui léng karah pawh hlawhtling taka kalpui a ni," a ti a; Aizawl khawpui urban slum-te'n inhlawhna an neih loh laiin thingtlangah inhlawhna neih thei a nih thu a sawi.

Saitual DRDA pisa thar hi KVI Complex hmunhmaah sak tur a ni a, April 2022-ah sak zawh hman beisei a ni. DRDA pisaah hian project director bakah thawktu pariat an awm mek a ni.