KHAWTHLIR

Thisen pe
Aizawl Hospital & Research Centre chuan nimin khan Aizawl Civil Hospital Blood Bank-ah thisen pek an huaihawt a, thawktu mipa 23 leh hmeichhia palite'n thisen unit 27 an pe. October 20, Nilaini khan ṬKP, Mampui Pastor Bialte'n BCM Gilgal Kohhran Hall-ah Lawngtlai District Hospital tan thisen unit 35 an pe a, petute mipa 28 leh hmeichhia pasarih an ni.

Kawngpui khâr
Bilkhawthlir Chemphai aṭanga Serlui-B tuikhuah panna péng inkar kawng chu siamṭhat mek a ni a, hei vang hian kawngpui hi khâr rih a nih thu Kolasib SP-in a puang. Thupek zawm lo chu 177 MV Act hmanga hrem an ni dawn a, ṭul bik thila police, Fire dept., ambulance, magistrate-te chet velna leh Kolasib SP-in phalna a pekte a huam lo ang. Harsatna tâwkte tan Bilkhawthlir Outpost phone number 8131934212 / 9366982075-ah biak theih a ni.

Vawk lak luh khap
African Swine Fever vanga Mizorama vawk suat tam berna leh ASF vanga vawk thi tam lama pathumna Serchhip district magistrate Kumar Abhishek chuan nimin khan Serchhip district-ah vawk lak luh leh hmun danga thawn chhuah khapna thupek a chhuah. Thupek hi thla hnih chhung hman tur a ni a; vawk hrisel ṭha chauh talh phal a nih thu te, vawk damlo hralh phal a nih loh thu leh, vawk sa aṭanga siam reng reng lak luh phal a nih loh thu tarlan a ni bawk.

Trolley inhlân
Labour, Employment, Skill Development & Entrepreneurship (LESDE) department leh Zoram Medical College hmalaknaa Industrial Training Institute (ITI), Aizawlin Covid-19 dona hmanrua bio-medical waste trolley pasarih an siam chu nimin khan LESDE secretary Lalramsanga Sailo-in ZMC hotute hnenah a hlân. Trolley siam nan hian ZMC-in hmanrua an tum a, ITI-in a thlàwnin an siam a ni.