Mizoram mipui zat aṭanga Covid-19 vei tawh zat 10.50%

October 20, Nilaini khan Mizoramah Covid-19 vei mi 741 hmuh chhuah a ni. Nimin khan hripui vei dam tawh mi 532 chhuahtir an ni a, Nilaini zan leh nimin khan mi 5 an thi. Mizoramah Covid-19 positive 1,15,207 hmuh a ni tawh a, chu chu kum 2011 chhiarpuia Mizorama mihring awm zat 10,97,206 aṭangin 10.50% a tling.

Covid-19 vei Nilainia hmuh tharte chu ZMC laboratory-a hmuh chhuah 125, TrueNAT hmanga hmuh 43, RAT hmanga hmuh 558 leh Fluorescent Immunoassay (FIA) hmanga hmuh 15 an ni a; mipa 346 leh hmeichhia 395 an ni.

IDSP record angin, Mizoramah Covid-19 vei 1,15,207 hmuh chhuah a ni tawh a, mipa 56,280 leh hmeichhia 58,927 an ni. Nimin tlai dar 5 thleng khan mi 1,05,080 (91.21%) chhuahtir an ni tawh a, mi 400 (0.35%) thi tawhin, enkawl mek mi 9,727 (8.44%) an awm.

October 20, Nilainia Covid-19 vei hmuh thar mi 741-te chu symptom nei 401 leh nei lo 340 an ni a; tualchhunga kái vek niin, an zingah hri kàina chin hriat loh 393 an awm. Kumin October thla chhungin hripui vei mi 20,377 hmuh chhuah a ni tawh a, chawhrualin ni tin mi 1,018.85 hmuh chhuah an awm ziah ang a ni.

Kum 2011 chhiarpui aṭanga chhûtin, Mizorama Covid-19 vei hmuh tawh 1,15,207 chu mi 1,000 zelah hripui vei mi 105 an awm ang a ni a; mi 1,00,000 zela Covid-19 vangin mi 36 an thi tawh ang a ni. Nimin khan tlai dar 5 thlengin hripui vei dam tawh mi 532 chhuahtir an ni a; Aizawl district-ah mi 353, Lawngtlai district-ah 72, Champhai district-ah 49, Lunglei district-ah 34, Mamit district-ah 17, Kolasib district-ah pali leh Hnahthial district-ah mi pathum an chhuak.

Mizorama Covid-19 vei hmuh chhuah hmasak ber chu March 24, 2020-ah hmuh chhuah a ni. IDSP tarlan danin, Mizorama hripui vei hmuh tawh 1,15,207 zinga mi 1,10,660 chu Mizoram chhunga kái chhâwng an ni a, mi 4,547 chu Mizoram páwn aṭanga an rawn luh hnua hmuh chhuah an ni.

Covid-19 positive hmuh tawh 1,15,207 zinga mi 1,13,563 chu civil mi an ni a; BSF mi 741, Assam Rifles-a mi 344, CRPF-a mi 122, BRO/BRTF-a mi 156, sipai (army) 64, National Disaster Response Force-a mi 32 leh truck enkawltu mi 185 an awm bawk.