ZMC-ah genome sequencing lab. peih ṭêp

Health minister Dr R Lalthangliana hoin nimin khan Secretariat conference hall-ah sorkar hotute leh páwl hrang hrang aiawhte'n Mizorama Covid-19 dinhmun an sawiho. October 27, 2021 khian ZMC-ah Covid-19 variant hrang hrang finfiah theihna Genome Sequencing Laboratory hawn tum a nih thu an tarlang.

Ṭhutkhawmah hian, Path company, USA-in dollar 52,00 man Genome Sequencing Laboratory a rawn pek chu ZMC-ah bun zawh thawkhat a nih tawh thu te, ICMR pawhin phalna a pek tawh thu leh thawktute pawh training pek vek an nih tawh thu te, October 27 khian hawn tum a nih thute an sawi a ni.

Mizoramah Covid-19 vei thar an tlem tial tial thu an sawi rualin, inthlahdah a la hun loh thu an sawi a; ZMC-a oxygen plant pathum - 200 LPM, 300 LPM leh 1000 LPM-te tluang taka hman mek a nih thu an tarlang bawk.

Tarlan danin, India rama mi vaibelchhe 100-in Covid-19 vaccine an la tawh a, Mizoramah chuan dose 11,89,163 pek chhuah tawh niin, dose la tawh zat chu dose khatna 89.4% leh full dose 71.7% a ni.

Tar chaklo, damlo leh chhan hrang hrang vanga vaccine pekna hmun pan thei lote chu an inah kal chilhin vaccine pek an ni a, chutiang mi 572 hnenah dose khatna leh mi 198 hnenah dose hnihna pek a ni tawh. Identity nei lo mi 6,199 hnenah dose khatna leh mi 503 hnenah dose hnihna pek a ni tawh bawk.

Ṭhutkhawmah hian Covid Medical Operational Team chairman Dr ZR Thiamsanga, MLA, chief secretary Lalnunmawia Chuaungo, DMR secretary Vanlalngaihsaka, Health secretary R Lalramnghaka, Aizawl DC, HFW, IPR leh Home department, AMC leh ZMC hotu te, IMA, MOT, MKHC, Joint NGO leh Aizawl City Local Council Association aiawhte an tel a ni.

Ṭhutkhawmnaa ZMC hotute sawi ṭhenkhat
• SRH-ZMC-a ICU-ah khum 44 a awm a, khum panga dang dah leh thuai tum a ni.
• Nimin chhun dar 12 thleng khan SRH Covid ward-ah damlo 221 leh anmahni awmpuitu Covid-19 vei ve tho mi 83 an awm.
• SRH ICU-ah mi 36 enkawl mek a ni.
• Covid-19 vei damlo enkawl mek zingah dyalisis tih ngai mi pali an awm.
• Covid-19 vei nau pâi, nau zai chhuah tur mi paruk an awm.
• August 2021 khan SRH-ZMC-a Covid-19 vei enkawl zingah thi mi 59, September-ah 63, October-ah ni 20 thlengin mi 59 an awm tawh.
• Kumin October thlaa thi mi 59 zinga 42 (71%) chu vaccine la kim tawh an ni a, upa leh natna khirh nei sa an ni.
• October thlaa SRH-ZMC-a Covid-19 vanga thi zingah vaccine la lo 45% an awm.