Police Commemoration Day hman a ni

Nimin October 21 kha India rama police, an duty laia thite hriatrengna ní Police Comme-moration Day a ni a, Mizoramah pawh chief minister Zoramthanga, Mizoram DGP SBK Singh leh police hotute'n 1st Bn MAP headquarters, Armed Vengah an hmang.

Police Commemoration Day-ah hian Chief Minister leh police hotute chuan police, an duty laia kut tuara thite hriatrengna Martar Thlànah sûnna leh zahna pangpar an dah a ni. District khawpui leh battalion headquarters-ahte hman a ni bawk.

DGP SBK Singh tarlan danin, September 1, 2020 aṭanga August 31, 2021 chhungin India ram hmun hrang hrangah police, an duty laia thi mi 377 an awm. Mizoram police zingah duty laia hmelma kuta thi an awm lo a, duty laia Covid-19 vanga thi mi paruk an awm thung.

Police Commemoration Day-ah hian ram chhunga police duty laia thite hming chhiar a nih hnuah anmahni hriatrengna leh sûnna hman ṭhin a ni a; Commemoration Day hmanna pui ber National Police Memorial, New Delhi-ah chuan Union Home Minister hoa hman a ni.