Covid-19 vangin mi 400 an thi tawh

October 20, Nilaini tlai dar 5 leh nimin tlai dar 5 inkarah Covid-19 vanga thi sorkar thuchhuakin a tarlan thar panga an awm a, an zinga pali chu natna dang nei tel an ni. Nimin tlai dar 5 thlengin Mizoramah Covid-19 vangin mi 400 an thi tawh a, October thla bikah mi mi 90 an thi tawh.

October 20 chhun dar 1:16 khan Thliazai (86), Meisatla-II, Siaha chu Siaha Dedicated Covid Health Centre (DCHC)-ah a thi. Covid-19 vei a ni tih October 20 khan hmuh niin DCHC-a dah luh a nih hnu rei lo têah a thi a ni.

Nilaini vek zan dar 7 khan Matthew Lalrozama (53), Serchhip chu State Referral Hospital (ZMC)-ah a thi a, natna dang nei tel a ni. Covid-19 vei a ni tih October 6 khan hmuh a ni a, October 8 aṭangin SRH-ah enkawl a ni.

Nimin chawhma dar 11 khan Renu Thapa (72), Bungkawn chu SRH-ZMC-ah a thi a; Covid-19 positive a ni tih October 9-ah finfiah niin, SRH-ah dah luh nghal a ni a, natna dang nei tel a ni.

H Zonunsanga (56), Dawrpui chu nimin chawhma dar 11:30 khan SRH-ah a thi a; Covid-19 vei a ni tih October 14 khan hmuh niin, SRH-ah dah nghal a ni a, natna dang nei tel a ni.

Khuangthawmi (89), Zemabawk pawh nimin chawhnu dar 2:05 khan SRH-ah a thi a; hripui vei a ni tih October 12 khan finfiah niin, SRH-ah dah luh nghal a ni a, natna dang nei a nih thu sorkar thuchhuakin a tarlang.