Economic Census data inmil lo sawiho

Chief secretary Lalnunmawia Chuaungo kaihhruaia 7th Economic Census buaipui tura din, State Level Coordination Committee (SLCC) chu nimin khan CS conference room-ah an ṭhu a, provisional result-a data ṭhenkhat dik lo nia ngaih theih leh data inmil lo chungchang an sawiho.

Planning & Programme Implemen-tation secretary Lalmalsawma Pachuau chuan, 7th Economic Census chu common service centre-te kaltlangin a vawi khatna atan digital mode-a kalpui a nih avangin data inmil lo leh dik lo nia ngaih theihte chu provisional results-ah a lang tih a sawi a ni.

Economics & Statistics department hotute chuan, CSC-te kaltlanga data lak khawm aṭanga Ministry of Statistics & Programme Implementation-in provisional results an tihchhuah leh district ṭhenkhata data a inmil loa ngaih theih a awm thu an tarlang a, "Data inmil lo siamṭha tur hian survey tih ṭhat leh ni se. Data la khawm tura CSC-in mi an rawih chhâwnte'n duh anga inhrilhfiahna ṭha an pek tawk loh avang leh internet ṭhat tawk loh avangtein data inmil lo a awm niin kan ngai," an ti.

6th Economic Census thleng khan Economic & Statistics department-in an buaipui vek ṭhin a, 7th Economic Census-ah erawh chuan sorkar laipui ruahman angin data lakkhawm leh upload hna chu CSC-te kutah dah a ni.