Minister-in zirlai thlahna hun a hmanpui

Agriculture lama thiam zirna School of Agriculture Science(SAS), Hnahthiala Basic Agriculture Training (BAT) batch 32-naa zirlai pass chhuakte pualin nimin khan an hmunah passing out ceremony buatsaih a ni a, Agriculture minister C Lalrinsanga'n a hmanpui a, campus thar sakna tur lungphum a phum nghal.

Agriculture Minister chuan zirlai zirchhuak tharte a lawmpui takzet thu sawiin, "Inthiamna leh theihnate hna hmuh nan ringawt a hmang mai loin, rinawmna leh taimakna nen loneitute tana ṭangkai taka hmang turin duhsakna ka hlan che u. He zirna sikul hi ka ngai pawimawh hle a, Agriculture dept. ka lak phat khan basic agriculture science zirna kalpui mek hi a ṭhat viau rualin diploma course tal zirthei tura upgrade turin theihtawp kan chhuah a, zir chhuak kan nei ta hi a lawmawm hle a, Mizoramin bung thar kan kai theihna tura a fatute zinga ka lo tel ve thei hi thinlung takin ka lawm a ni." a ti.

Kuthnathawktute tan sorkarin hmachhawp hrang hrang a neihte pawh sawi langin C Lalrinsanga chuan, "Chemical tel loa rannung hmang veka rannung thahna atan biological laboratory buatsaih mek a ni. Kan ramin alu tam zawk kan tharchhuah theih nan Thingdawl, Kolasib district-ah alu tissue culture bulṭan tum a ni," a ti a, an ram Leilung daih zai zawk leh hlawk zawka buh leh thlaite kan tharchhuah theih nan chherchhuan thum hmanga loneih dan thar three tier farming system pawh sorkarin kalpui a tum thu a sawi.

School of Agriculture Science hi April 4,1981 khan Integrated Traning Centre tiin bulṭan a ni a, subject paruk awmin he hmun aṭanga zirchhuakte hi basic agriculture science certificate pek ṭhin an ni. January 9, 2020 khan centre hi upgrade niin, subject 12 zir theih a ni tawh dawn a, zirchhuakte pawh diploma in agriculture science pek an ni tawh.