Covid-19 laka invênna damdawi (vaccine) Covishield chu January 16, 2021-ah Aizawl leh Lungleia pek ṭan a nih hnuah, district dangahte pawh tun kar tìr lam khan pek ṭan ve leh a ni a; nimin tlai thleng khan mi 2,537 hnenah pek a ni tawh.
Covid vaccine chungchanga sorkar thupuangtu Dr Lalzawmi hnen aṭanga thu dawn danin, Covishield hi Mizorama district tinah pek ṭan a ni tawh a; nimin tlai dar 5 thleng khan mi 2,537 pek tawh niin, pek tam tawhna ber Aizawl district-ah 1,206 pek a ni tawh. La pek lohte hnenah pek chhunzawm zel a ni ang.
Covishield hi tun hnai khan mi 16,500 daih tur a rawn thlen belh leh tawh a, a tira dawn tawh dose 19,500 nen a vaiin dose 35,000 a rawn thleng tawh a ni.
Nimin khan Siaha, Champhai, Kolasib leh Serchhipahte damdawi-ina thawk (healthcare worker)-te hnenah Covid-19 damdawi pek ṭan ve leh a ni a; damdawi pek ṭan pualin inkhawm tawi buatsaih a ni hlawm.
Siahaah chuan chawhma dar 11-ah District Hospital Medical Superintendent pisaah damdawi pek ṭanna inkhawm buatsaih a ni a, bawrhsap Kesavan R-a'n
a hmanpui.
Siaha district-ah hian vaccine dawng tura CoWin apps-a healthcare worker thun luh tawh zat chu mi 719 an ni a, nimin bikah chuan mi 100 hnenah pek tum a ni.
Champhaiah pawh bawrhsap Maria CT Zuali hoin District Hospital-ah vaccine pek ṭan pualin inkhawm buatsaih a ni. Inkhawm kaihruaitu chief medical officer Dr R Lianmawia chuan, Champhai district-ah Covid-19 vei mi 94 hmuh chhuah a nih tawh thu leh chu'ngte chu dam taka an chhuah vek tawh thu a sawi.
Champhaiah hian nimin khan vaccine pekna tur hmun pali - District Hospital, Mimbung PHC, Ngopa CHC leh NE Khawdungsei PHC-te ruat a ni a, nimin khan Covishield pek ṭan niin, Champhaiah mi 100, Mimbungah mi 43, Ngopaah mi 34 leh NE Khawdungseiah mi 44, an vaiin mi 221 pek hman tum a ni.
Serchhipah chuan vaccine pek ṭanna inkhawm chu Presbyterian English School hall-ah buatsaih a ni a, bawrhsap Kumar Abhishek, District Health Society chairman ni bawkin a hmanpui.
Serchhipah hian centre pahnih - PES Centre leh Midland Middle School Centre-ahte pek a ni a; vawiin aṭangin Thenzawl CHC Centre-ah pek chhuah ṭan ve leh a ni ang. Serchhip district-a damdawi pek hmasak tur zat chu healthcare worker mi 450 an ni.
Vaccine pek tawh zat
(21.1.2021 5:00 p.m)
District Jan. 21 Total
Aizawl East 217 786
Aizawl West 161 420
Lunglei 105 485
Siaha 74 74
Champhai 170 170
Kolasib 77 77
Serchhip 131 131
Lawngtlai 94 294
Mamit 0 100
TOTAL 1,029 2,537
(Note: District hi Health department-in district a ṭhen ang a ni a, district thar pathumte a hranpaa dah a ni lo)
