Bilkhawthlir Jt. VC-in FIR an hnûk kîr

Bilkhawthlir Joint Village Council chuan an huam chhunga VC seal lem siam leh VC President hlui signature lem hmanga periodic patta dil an awm nia an hriat vanga Bilkhawthlir Police Station-a FIR an thehluh tawh chu an hnûk kîr.

Vanglaini thu dawn danin, seal lem leh sig­nature lem hmanga puh mi 16-te'n ngaihdam an dil a, signature lem an hmansak nia hriat Bilkhawthlir VCP hlui F Tlangkhuma'n ngaihdam mai pawi a tih loh avangin Bilkhawthlir Joint VC chu an ṭhukhawm a, a tam zawkin FIR hnuh kìr ṭha an tih avangin an hnûk kîr ta a ni.

Bilkhawthlir Joint VC hruaitute chuan Vanglaini palai zawhna chhángin, FIR chu hnuh kìr ni mah se, Joint NGO-te nen dan dik loa an khaw ram chhunga periodic patta pek an remtih dawn loh thu an sawi a, "Periodic patta diltute hian an dilna an hnûk kîr niin an sawi a, tak tak a ni em kan hre lo," an ti.

Bilkhawthlir Jt. VC hian January 16, 2020 khan FIR an thehlut a ni.