KHAWTHLIR

Mark Advertising, Aizawl chuan January 20, Nilaini khan Event and Entertainment Management Association, Delhi-in India ram puma Event Management Award an semah India east zone bikah 'Most Innovative and Impactful setup by Production House for Corporate Events/Award Nights' an dawng. Award-ah hian India rama event management buaipuitu 17,034 an tel a; award semna inkhawm hi ràlthlir (virtual) hmanga huaihawt a ni.

Mizoram University leh Indian Institute of Food Processing Technology chuan January 20, Nilaini khan thawhhona thuthlung, Memorandum of Understanding (MoU) an ziak. MoU ziahnaah hian Union minister of state for Food Processing Industries (MoFPI) Rameswar Teli khuallian a ni.

Hnahthial leh Tarpho khuaah nimin khan Commerce & Industries director J Hmingthanmawia'n Commerce & Industries Centre buatsaih Handloom Training a hawng. Centre-a tel zirlaite chu stipend thla khatah Rs. 1,000 pek an ni dawn a, zir chhuakte hnenah Rs. 20,000 hû khawl leh a dahna tur siam nan Rs. 30,000 pek an ni bawk ang. Puantah zir tur hian a thawh khatnaah mi 20 lak an ni a, thla ruk chhung an zir dawn a ni.

Minister of state Lalruatkima chuan nimin khan a bial chhunga Dinthar vengah Mizoram Cooperative Apex Bank (MCAB) branch thar leh ATM booth thar a hawng. MCAB hi July 31, 1982-ah din a ni a, Dinthar branch hi an branch 22-na a ni.

State Referral Hospital-ah nimin khan Covid-19 vei mi pakhat dah luh a ni a, ani nen hripui vei vangin SRH-ah mi 10 enkawl mek an ni. SRH-ZMC Bulletin tarlan danin, mi 10-te chu Isolation ward-ah an awm vek a, an zinga pahnih chu oxygen pek mek a ni. Nimin khan mi pakhat chhuahtir a ni a, Covid-19 vei mek, nau pâi chu a naute zai chhuah a ni bawk.