Mizoram Synod-in inkhawm dan tur Tualchhung kohhran rèl turah a dah

Mizoram Synod chuan, February 1, 2021 aṭanga biak-inah inkhawm ṭan theih a nih avangin, inkhawm dan tur chu tualchhung kohhrante'n an remchan dan leh a ṭha bera an hriat anga kalpui tur a nih thu a tarlang.

Synod chuan nimin khan kohhrante hriat tur tichhuakin, Covid-19 léng avangin March 22, 2020 aṭangin kohhran inkhawm neih a nih tawh loh thu a tarlang a, "February 2021 aṭangin Inrinni leh Pathianni chhûnah inkhawm neih theih a ni dawn a. Kan Kohhran chuan Pathianniah inkhawm tur a ni ang a, 'chhun' tih hian ‘khaw èn chhung’ a huamah a ngai a. Hemi chhunga inkhawm kalpui dan tur chu tualchhung kohhranin an remchan dan leh ṭha bera an hriat ang ṭheuha rêl mai turah a ngai a ni," a ti.

Inkhawma zai leh zai loh chungchangah Synod chuan sorkarin kaihhruaina a siam zui turin kohhrante a ngen a; inkhawma telte hripui inkài darh theihna laka an him theihna turin fimkhur leh uluk taka ruahmanna siam turin a ngen bawk.