Covishield a rawn thlen belh

Health minister Dr R Lalthangliana hoin nimin khan Secretariat conference hall-ah Mizorama Covid-19 dinhmun thlirho a ni a; Covid-19 laka invènna damdawi (vaccine) Covishield a rawn thlen belh thu tarlan a ni.

Health Minister chuan, Mizoram dinhmun a him tawh viaua hriatna avangin inthlahdah palh a hlauhawm tih sawiin, "Tun hnaiah tualchhunga hri kái thar an awm leh tâk nual avangin tu mah inthlahdah lo ila, theihtawp chhuahin i fimkhur zel ang u," a ti.

Meeting-a tarlan danin, tun hnaiah Covid-19 vaccine dose 16,500 dawn belh a ni a, a hmaa dawn tawh nen a vaiin dose 35,000 dawn a ni tawh. Tun dinhmuna vaccine dawn tawh hian healthcare worker zawng zawng a daih tawh a; nimin chhun dar 1 thleng khan mi 2,010 hnenah dose khatna pek a ni tawh.

Vawiin hian pawl 10 leh 12 zirlai tan sikul hawn ṭan a ni dawn a, chuvang chuan School Education department-in Standard Operation Procedure an siam chu meeting-ah hian enho a ni.

Zirlai hostel-a lut turte tan Rapid Antigen Test (RAT) hmanga swab sample endik vek a ngaih avangin, RAT hmanga sample endikna tura ruahman sa Bawngkawn leh Chawlhhmuna mi chu mamawhna a sàn avangin tihlen a nih thu tarlan a ni.