Zirtirtu indaih loh zualna sikul tan Contract-in zirtirtu lâk a ni dawn

School Education minister Lalchhandama Ralte chuan, zirtirtu indaih loh zualna sikulte harsatna phuhrûkna turin zirtirtu contract-in lâk lailâwk a ni dawn tih a sawi.

Nimin zinga Zuangtui leh Ṭhuampui venga sikulte a tlawhnaah khawtlang hruaitute hmaah thu sawiin Minister chuan, "Sorkarin high school zirtirtu 150 chuang lak min phalsak tawh a, mahse, Covid-19 avangin lâk mai theih a ni lo. Chuvangin, zirtirtu indaih loh zualna sikulte harsatna phuhrûk dan tur ngaihtuah a ni a, con­tract-in zirtirtu lâk a ni dawn," a ti.

Education Minister chuan, contract-a zirtirtu lâk chu school managing committee kutah dah a ni dawn tih sawiin, "Tuna zirtirtu indaih lohna avanga harsatna sutkian nan school managing committee-in an khawtual mi emaw, khawtual mi ni kher lo pawh mi ṭha an ruai dawn a ni," a ti a; contract-a zirtirtu rawihna atan SEDP hnuaiah cheng nuai 157 dah a nih tawh thu a sawi.

Lalchhandama Ralte chuan, zirtirtu a ngheta lâk tumna chu Covid-19 avangin tih theih a ni lo a, hun remchang hmasa berah lâk tum a nih thu a sawi a, "Sorkar ráwn chungin, sorkar sum dinhmunte thlirin ruahmanna siam a ni ang," a ti.

School Education Minister hian Zuangtuiah adhoc aided high school sak ṭhat ngai te, primary school leh middle school an awmna mual leilung a chêt vanga sawn ngaite leh, Ṭhuampuiah Ṭhuampui Primary School, Tej Singh Middle School leh Ṭhuampui High School dinna tur ramte a enfiah a ni.