National Handloom Expo 2020 ṭan a ni

Commerce & Industries minister Dr R Lalthangliana chuan nimin khan Millennium Centre chung zawlah puantah phochhuahna, National Handloom Expo 2020 a hawng. Sorkar kum thar aṭangin awmze nei zawkin industry tihhmasawnna tura hmalak theih a nih a beisei thu Minister chuan a sawi.

Dr R Lalthangliana chuan, Covid-19 hripui a lèn avangin mi dang tam tak ang bawkin puantaha eizawngte pawhin harsatna an tâwk tih sawiin, "Hripui boruakin ziaawm lam a pana a lan mek avangin puantaha eizawngte hian beidawng loin ṭan la thar turin ka duh che u. Mizoram sum leh pái ṭhanna leh khai chhuahna kawngah in hnathawhin thui tak nghawng a nei a ni," a ti.

Covid-19 avangin sorkarin sum leh páiah harsatna a tawh thu sawiin Minister chuan, "Financial year thar aṭang chuan hmalakna awmze nei deuh hlek, a sema sem tawp chi ni lo, ti tak tak peihte dinchhuahna turin Industries department chuan ruahmanna kan siam ang," a ti bawk.

Expo hi ZOHANDCO buatsaih niin, sum tumtu chu Development Commissioner of Handlooms, Ministry of Textiles a ni a, January 23, Inrinni thleng a awh ang. Expo rualin ZOHANDCO chuan National SC/ST Hub hnuaia Handloom Expo 2021 an buatsaih nghal a, puantaha eizawng mimal leh pawl 30 chuangin an puantah leh thil siamte an phochhuak a ni.