Mizoram Police kum 50-na lâwm

Nimin January 21 kha Mizoram Police din champha vawi 50-na, golden jubilee a ni a, Aizawl bakah, hmun hrang hrangah lawm a ni.

Mizoram Police Raising Day vawi 50-na hi Aizawlah chuan Police Headquarters-a GS Arya Mess-ah lawm a ni a, Aizawla police officer SP leh a chung lamte telin, DGP SBK Singh leh additional DGP LH Shanliana ten an hmanpui.

SBK Singh chuan, Mizoram police chu thil chhui kawngah intuai thar tur leh technology hmang ṭangkai tur te, ruihhlo donaah chak taka hma la tur te, police hamṭhatna (welfare) ngai pawimawh turtein a fuih.

Mizoram Police hnuaia unit leh office hrang hrangah pawh police din champha lawm a ni a; inkhawm neih a nih bakah, vantlang leh police hmunte tihfai a ni. 1st Bn. MAP, 2nd Bn. MAP, 3rd Bn. MAP leh 2nd IR Bn.-a band party-te chuan an hmunah ṭheuh band display an nei a ni.

Mizoram Police thuchhuah tarlan danin, Mizoramin union territory a hmuh ní, January 21, 1972 aṭangin Assam police aṭangin Mizoram police a indang a, Mizoram IGP hmasa ber chu IJ Verma, IPS a ni. A tirah chuan unit pali leh police mi leh sa mi 200 vel chauh an awm.

Tunah chuan Mizoram Police hnuaiah hian district 11, sub-division 18, police station 40, special police station pathum, out post 13, armed battalion pariat (MAP battalion pathum leh IR battalion panga), border out post 23, unit dang paruk a awm mek. Mizoram Police hnuaia post awm zawng zawng chu 12,206 a ni a, chu'ng zinga post 8,634 chu hnawhkhah niin, post ruak 3,572 a awm mek.

British hoin India ram an awp lai aṭangin Mizoramah police an awm tawh a, Mizorama police station hmasa ber chu Tlabung Police Station niin, kum 1889-a din a ni.