Hunpuiah boruak bawlhhlawh a tlem Kum hmasa aiin a bengchheng zawk

Mizoram Pollution Control Board (MPCB) chuan kum 2020 Krismas leh kum thar 2021 lawmna vuakvêt, December 18, 2020 aṭanga January 6, 2021 inkárah Aizawl boruak a thianghlim hle a, kum hlui thlahna leh kum thar lawm zanah erawh chuan kum hmasa aiin ri bengchheng a nasa zawk tih an tarlang.

MPCB hian kum danga an tih ṭhin angin nikum Krismas leh kumin kum thar vuakvêta Aizawl boruak dinhmun zir chianna a nei leh a; Diwali laia Central PCB kalphung zûlzuiin kumhlui thlah zan thlen hma ni 14 chhûng leh kum hlui thlah zan pelh hnu ni 14 chhúng - December 18, 2020 aṭanga January 14, 2021 inkarah zirbingna an kalpui a ni.

MPCB tarlan danin, December 18, 2020 aṭanga January 6, 2021 inkárah boruak bawlhhlawh dan tehnaah Air Quality Index (AQI) chu chawhrualin 23 chauh a ni. Kumin January 7 aṭangin khua a vawt zual ṭan a, romei ang chi a zám nasa a, January 10-ah chuan AQI chu 147 tlingin, boruak bawlhhlawh dan stage-3 a kái a ni. January 7-14, 2021 inkar bika AQI chawhrual chu 85 a tling. 

January 7 hnu lama AQI a sàn chhan nia lang chu, kum hlui thlah zana hàlpuah hâlah lei lama puak chi aiin van sáng lama puak chi hàl a tam a; a tìrah boruak bawlhhlawh tehnaah nghawng nei lo mah se, chawlhkár khat hnu velah lei lamah tla thla lehin, boruak a tibawlhhlawh ta niin an ngai.

Hetih lai hian, zan lama bengchhen nasat danah erawh chuan kum hmasa aiin December 31, 2020 zanah ri bengchheng a nasa zawk. MPCB chuan New Capital Complex, Dawrpui, Bawngkawn leh Laipuitlangahte tehna an dah a ni.

Tehnaa a lan danin, December 31, 2020 zan dar 6-12 inkárah tehna hmun paliah darkar tinin rîin 50 dB a pèl vek. Dawrpuiah chuan rî a rin lai berin 91.8 dB a ni a, hei hi December 31, 2019-a a rin lai ber 82.3 dB aiin a sáng zawk. Laipuitlangah pawh 84.5 dB a tling.

Chawhrualin, December 31, 2020 zanah hian rî rin zawng chu Dawrpuiah 63.55 dB leh Laipuitlangah 71.29 dB a ni a; hei hian sorkar laipuiin zan lama ri bengchheng sán lai ber ni tura a tih 45 dB a pêl a ni.

MPCB chuan, pollution chi hrang hrang a tlêm theih nan mipui an ṭhanharh a ṭul thu tarlangin, "Hàlpuah leh hàlmawi tel loa kum hlui thlah liam kan zir a ngai hle a ni," an ti.