Help & Guidance Desk buatsaih ṭan

Road Safety Month hman mekah Transport department leh Traffic police-te chuan Help & Guidance Desk an buatsaih a, nimin aṭang khan mipui dàwr theih turin Vanapa hall tualah an ṭhu ṭan.

Transport department hotute chuan, Road Safety Month-ah hian document fel lote an endik lo a, dan zâwm lote an man loh thu Vanglaini palai an hrilh a, "Covid-19 avangin central sorkarin March 2021 thleng lirthei document fel lote ngaihhnathiam tur a tih avangin tun kuma Road Safety Month-ah chuan mipui ṭanpui zawngin kan che chhuak a ni," an ti a; Help Desk chu mipuiin hmang ṭangkai se an duh thu an sawi.

Help & Guidance Desk-ah hian mipui dawr theih turin MVI hotute an ṭhu a, lirthei chhiah (tax leh fee) pek tawh dan te, license chungchang leh lirthei kaihhnawiha sorkar inkaihhruaina dan hrang hrangte zawhfiah theih a ni.