Edenthar Field-ah phûl lem phah tum Sum awm lo kan phum ngai lo - Dy. CM

Deputy chief minister leh MNF senior vice president Tawnluia chuan nimin zing khan Aizawl North-III MLA bial veng ṭhenkhat a tlawh a; Edenthar Veng Field-a phùl lem (astro turf) phahna tur a tlawhnaah thu sawiin, sum awm fel sa loin lungphùm an phúm ngai lo niin a sawi.

Tawnluia chuan, "MNF sorkar hnuaiah hmasawnna hna thawhna tur pawisa awm fel sa loin lungphùm kan phúm ngai lo. Sum sanction a awm fel sa vek hnuah lungphùm kan phúm chauh ṭhin a, chumi hnuah tender chhuahin hna thawhin a zui zel dawn. Ram rotling thawhna tur lungphùm kan la phúm dawn chauh a ni," a ti.

Sports & Youth Services minister Robert Romawia Royte pawhin thu sawiin, "Aizawla veng hrang hrang field parukah phùl lem phahna tur kan tifel tawh a, Edenthar Veng hi a tel hmasaah a ṭang a, a tel chhan hi bialtu MLA Pu C Lalmuanpuia’n bial hmasawnna tur a vei vang a ni," a ti a; field hmunhma rem lo deuh mah se, FIFA-in a pawmpui thei turin a dung metre 90 leh a vâng metre 45-a liana siam a nih dawn thu a sawi.

SYS Minister sawi danin, Edenthar Veng field-ah hian cheng nuai 700 hmangin Aizawl Smart City hnuai aṭangin hna ṭan a ni dawn a, field bakah, khawtlang mamawh dangte dah an tum a ni.

UDPA minister Tawn-luia chuan, Chanmari West aṭanga Chanmari Presbyterian Kohhran biak-in bul pénga zauhna tur (Improvement of Chanmari Junction)-a kawng tihzauh dan tur a en bawk a; kawng zauh nan UDPA department aṭangin cheng nuai 30 hman a nih dawn thu leh PWD-in an khawih dawn thu a sawi.

Tawnluia hian Hunthar Venga Chhawn-zinga Water Supply Scheme, cheng nuai 120 hmanga thawh mek a tlawh nghal a; tui lâkna chuan Hunthar Veng, Edenthar Veng leh Chanmari West veng ṭhenkhata mi 7,000 vel a châwm theih tur thu a sawi a ni.