Swami Vivekananda U20 Men’s National Football Championship-ah Mizoramin an thiam tih an lantir zel a, nimin khan an group-a anmahni elpha ve thei tura ngaih Rajasthan chu 7-0 in an sawp. Mizoram tan Muanna Veng tlangval Lalrothlanga'n hattrick a siam a, Lungdai midfielder Lalngaihsaka'n goal hnih a khung bakah Ainawn rawlthar Lalthankima leh Lunglei Zotlang forward Sawma Tlangte ten goal khat ve ve an khung bawk.

Mizoram hian match thumah hnehna an chang vek a, point kua hmuin group F-ah pakhatna an ni. HC Zarzoliana leh Laldampuia enkawl Mizoram team hian quarterfinal-ah group G pakhatna Assam an hmachhawn dawn a; May 18, Inrinni hian semifinal khel tur an zawng ang.

Goal li phawt

Mizoramin ṭan phat aṭangin team ṭha zawk an ni tih an pholang a, minute lina lekah mual vei lam aṭangin Gilbert Lalbiaksanga'n a ke dinglama ball a vawrhluh chu box chhungah captain Thathana'n ball la thlain a ṭhianpa Ngaihtea tan a siamsak a, Lungdai midfielder hian chiang zetin vawi khatah a volley goal.

Thathana leh Ngaihtea te hi inkawp chawt an ni a, Kolkata club Kalighat Sports Lovers Association-ah an khel kawp a, Aizawlah an training ṭhin avangin Ngaihtea hi Thathana te inah a awm chawt zel. Player pahnih hi khelmual pawnah an inhrechiang a, khelmual chhungah pawh an inkawmngeihna a lang.

Ramhlun Vengthar midfielder Lalremtluanga (Mamatea) hi midfielder chhuak thar zinga box to box player ṭha ber zinga mi a ni a, minute 11-naah Mamatea hian ball fing pe lutin Rothlanga'n goal-ah a chantir.

Mintue 18-naah Ngaihtea leh Thathana te 'combination' a rawn lang leh a, Rothlanga 'dummy' zeuh a pawimawh bawk. Mizoram captain Thathana'n goal thumna a khung a, quarterfinal an lut dawn tih a chiang tawh.

Mizoramin tha an thlah phah lo. Thathana tlan chak vangin Rajasthan defender a talbuai a, Ainawn rawlthar lakah penalty chawiin Lunglei Zotlang winger Sawma Tlangte-in minute 21-naah goal-ah a chantir.

Goal thum dang

Mizoramin second half-ah pawh inkhel an thunun a, Rajasthan player-ten Ngaihtea an chelh lo a ni ber. Ngaihtea hian awlsam taka Rajasthan player a tlan pelh hnuah a ball fing zet chu Rothlanga'n um lutin chiang takin a pet goal.

MPL10-ah Rothlanga hian Mizoram Police tan goal khat a khung a, khelmualah hmuhnawm ṭhin mah se a naupanna a la lang. Tun ṭumah erawh Muanna Veng tlangval hi a hriam ta hle.

Minute 64-naah Mizoramin chiang takin Rajasthan tlarhnung an ṭhiat a, Thathana ball pek luh chu Freddy Lalruatkima'n lei hrula cross-in Rothlanga'n hattrick siam nan a hmang.

Mizoramin goal thum an khung a, Thathana an thlak vanga captain armband hrengtu Ngaihtea'n box pawn aṭangin minute 77-naah kawh zetin a pet goal. Rajasthan-in Mizoram kawng tinrengah an ngam lo a, HC Zarzoliana hote 7-0 in an chak.

Thuawih rual

Mizoram manager C. Lalramdinsanga (RD-a) chuan, "Team hi ka lo hruai ve nual tawh a, hetiang anga thuawih hi ka la hmu lo. Mut hunah an mu a, thawh hunah an tho a, thu an awih hle. Mimal takin mak pawh ka ti zawk a, Mizo naupang ka hriat ṭhin nen an inang lo. Tun inelnaah pawh beiseina sang tak ka neih phah a, an kal lehna zel turah pawh ka beisei sang hlawm khawp mai," tiin Vanglaini a hrilh.

RD-a chuan sawi chhunzawmin, "Chhattisgarh FA an fel a, manager anga ka tih tur tam tak a hahdam phah. Kan mamawh apiang min tihsak a, min ngaihsak hle. MFA lam pawhin chanchin an ngaihven reng a, an chungah kan lawm. Kan coach pahnih Zara leh Dampuia te an thawkrim a, an zarah champion nomawi kan hawn theih ngei kan ring tlat a ni," tiin Vanglaini a hrilh a, Mizo mipuite ṭawngṭainaa hre reng turin a ngen bawk.