Klopp-a hote hmachhawn turin Chelsea an inpeih em?

Premier League champion thar Liverpool hi Jurgen Klopp-a kaihhruaina hnuaiah season thum chhung vel chu team ṭha ber zinga mi an ni tawh hrim hrim a, Chelsea hian elpha turin an ṭha tawk em tih erawh hunin a hril ang. Chutihrualin Frank Lampard-a'n ngawih a chuh lo a, kumin July thla khan English manager leh Reds coaching staff-te a langa mawi chin pelin an inchhang tawh.

Season ṭantirhah Klopp-a'n Chelsea player lak dan chu uchuak hret nia a ngaih thu a lo sawi zeuh tawh a, Lampard-a'n nomawi chawi tumin Liverpool tih hnu an tih ve mai thuin a chhang let. Tunkar tawpah team pahnihte hi an inhmachhawn nghal dawn a, Chelsea hi Reds hmachhawn turin an inpeih tih hi a hriat châkawm lai chu a ni.

Kum 24 mi Timo Werner-a'n match hmasa berah harsatna a tawk lo a, a tlan chak vanga lar German forward khelh dan hi Premier League nen pawh a inmil nghal viau. Amaherawhchu penalty a hlawhchhuahna turah keeper Ryan-a'n a malpuiah a do fuh a, Reds nena inkhelh hun atan a dinhmun a chiang lo. 

Kum 21 mi Havertz erawhin hun a la mamawh dawn niin a lang a, Werner aia Chelsea a zawm hnuhnun zawk vang a ni thei bawk. Lampard erawh German duo khelh danah a lawm a, Havertz pawhin tih ṭhat langsar nei lo mah se a thawhrimna leh thiamna a hmuh hmaih lo.

Chelsea player thar dang Hakim Ziyech-a'n Liverpool a la hmachhawn theih hmel loh a, chutihrualin Reds hmachhawn tur hian Christian Pulisic a inpeih hman hmel a, Mateo Kovacic-a'n hremna a hman zawh dawn bawk avangin attacking lam chu an inpeihah a ngaih theih - duhthusam erawh an la hlat. Chutihrualin tlarhnung erawh an ngaihtuah awm hle.

Chelsea aṭanga inzir chhuak Tariq Lamptey-a'n left back Marcos Alonso a chhaih buai hneh a, Trent Alexander-Arnold hmachawn tur chuan Ben Chilwell a dam hman a ṭul. Leicester aṭanga an lakluh Chilwell hi a dam hman hmel a, mahse match fitness a nei dawn lo. Brazilian defender tawnrhiat nei ṭha Thiago Silva dinhmun a la chiang lo a, hattrick siam hlim Mohamed Salah leh Sadio Mane te lakah chuan an la buai fu ang.

Buaina belhchhah turin keeper manto Kepa Arrizabalaga-a'n ho lam takin goal a chhuah a, Rennes aṭangin pound maktaduai 20 man keeper Edouard Mendy an lalut hman a nih pawhin bul ṭan tur em chuan a inpeih hman a rinawm loh. Spanish keeper Kepa-a'n season hmasa tawp lamah kum 38 mi Willy Caballero tluk loh chang a nei a, London club-ah a cham rei ang em tih chu zawhna a ni ta.

Frank Lampard chuan, "Hma kan sawn zel dawn. Kan match hmasa ber chauh a ni a, ni li chauh a hu hoa training-na hun kan nei. Kan zinga mi thar pahnihin bul an ṭan a, lawmna tur tam tak a awm. Ka beisei ram kan la thleng lo a, kan duhthusama khel turin hun a duh ang. Chutihrualin league match hmasa bera chak hlut zia kan hria a, kan result-ah kan lawm hle," tiin hun an la mamawh tur thu a sawi.



Share this Post

Login to comment
No Comments