Brighton mualah Chelsea an chak

Chelsea tan season duhawm a ni lo a, an chet ṭhat loh avangin sawiselna pawh an tawng nasa - a tawp lamah erawh an rawn tho kang a, tunah chuan season thara Europa League khel thei dinhmunah an ding leh ta.

Nilaini zan Premier League inkhelah Blues hian Cole Palmer leh Christopher Nkunku te goal hmangin Brighton chu 2-1 in an hneh, mualneitu lam tan Danny Welbeck chuan hun tawp dawnah goal khung mah se awmzia a nei phak tawh lo.

English forward Palmer hian tun season EPL bika a goal 22-na chu mawi takin a tauh lut, box sir lam aṭanga Marc Cucurella-a cross chu Palmer-a'n laklawh nei miah loin a lo tauh a, goal kilah cool zetin a lut.

Blues tan point thum hlu bik a ni a, chutihrualin substitute Reece James erawh a chesual. Captain James hi hliam vangin rei tak a chawl a, a lo kir leh hnuah beisei nei sang viau mah se hnawhchhuah a ni.

England international defender James hi tun season atan vawi hnih hnawhchhuah a ni tawh, league match hnuhnung ber bakah season thara an league match hmasa pathumah a inkhel thei dawn lo, match li atan hrem a tawk.

Mauricio Pochettino naute hian tun kar tawpah Bournemouth an mikhual dawn, point khat lek pawh an hmuh belh a nih chuan midang result ngaihchan tel ngai miah loin European football khel turin an tling chiang ang.

Blues season ṭha lo kara khai chhuaktu pawimawh Palmer chuan, "Parukna nih leh nih loh chu kan kuta awm a ni ta. Chelsea hi club lian tak kan ni a, mite chuan parukna aia sang ni turah pawh min ngai vekin a rinawm.

"Amaherawhchu, season kan hman dan chu hriat vek a ni a, hun harsa tak kara hetiang dinhmun kan beisei phak ve leh ta pawh hi a lawmawm takzet. European football khelhn chu thil ṭha leh kawng dik zawhna a ni ngei ang," tiin a sawi.