Silly Point : Pitch muang leh inkhel rang

Indian Premier League 2024 group stage hmawr kan lo bawk dawn ta. Playoff khel tur team palite chu a chiang deuthaw tawh. Shah Rukh Khan-a naute Kolkata Knight Riders-ten league stage-ah chungnung ber nihna an hauh tawh a, Rajasthan Royals pawhin knockout stage an lut chiang tawh. Hmun ruak pahnih dang hi last round thleng team pangaten an la inchuh dawn a nih hmel.

Pitch a muang ṭan

Thla hnih taltawp India nipui nisen sa hnuaiah an han inkhelh takah chuan, pitch pawh a lo rimin, khawkrawk a tam ve telh telh a. Silly point hmasa lama kan lo thailan tawh angin, spinner-te an rawn pawimawh ṭan a, 200 runs chuang siamna inkhel a vang chho ṭan. Tunah chuan 160 runs vel hi total ṭha a ni chho ṭan ta.

Home hmang thiam CSK

Chepauk, Chennai-ah an home game an khelh apianga pitch timuang a, spinner-te hlauhawm tura curator-te siamtir ṭhin Chennai Super Kings hi playoff thleng tura rin kai ber an ni ta. Heta a chhan lian ber pakhat chu, an home ground pitch-ah an spin department-te an hlauhawm ṭhin vang a ni. Mahendra Singh Dhoni-a'n a team te a hrechiang kan ti lo thei lo ang.

Irhfiak ching

Kumin IPL a bul ṭan ṭha, mahse thlensan luhai nei a, irhfiak ta deuh tlat Rajasthan Royals leh Sunrisers Hyderabad te hian an inkhelh hma bakah hnehna an chan chuan playoff lut chiang sa an ni. Amaherawhchu tun hnaia an inkhel hnuhnung palia tlawm vek Rajasthan Royals leh inkhel hnuhnung pangaa ṭum thum tlawm tawh Sunrisers te hi , tun hnaia an khawsa zia han en hian, champion lam rawng an kai ta lo riau.

Royals leh Sunrisers te hian tournament bul an ṭan that zar an lo zo mai mai hrih kan ti thei ang. Engpawh nise, insiamṭhat hun lai tak a ni a. Knockout chinah chuan, a hunah tak team anga vawrtawp thlen hi a pawimawh ber an tih kha maw.

Playoff confirm-na kartawp chibai vek u le.